Maar kry koue antwoorde – Wat Sê Dit Van Ons Leiers?
Ashley Rix – Sosiale Media
MANENBERG:- “Die gebeure op die Nigel Pierce Show op Heart FM, sit steeds swaar op my en op baie luisteraars se harte”.
“Dit was ’n rou en eerlike oomblik wat blootgelê het, hoe afgesonder sommige van ons leiers van gewone mense se werklikheid is.”
Tydens die onlangse vloede het ’n ouma van Manenberg, Firdous, die radio program gebel. Sy was emosioneel, bang en vasgevang in haar huis saam met haar twee kleinkinders, terwyl water in hul huis ingestroom het. Die elektrisiteit was af, die huis het begin oorspoel en sy kon skaars sien.
Nigel Pierce het kalm gebly en met opregte besorgdheid probeer help.
Hy het haar selfs gelei oor hoe om die krag by die hoofskakelaar af te sit. Jy kon hoor hy gee om, nes soveel ander luisteraars wat net wou hê hierdie ouma en haar kleinkinders moet veilig wees voor die nag toesak.
Nigel het ook Premier Alan Winde en Stadsraadslid Carl Pophaim van die Stad Kaapstad ingeskakel in die hoop dat hulle sou help.
Maar hul reaksie was teleurstellend.
Op ’n stadium het Raadslid Pophaim vir Firdous gevra om sy selfoonnommer neer te skryf.
Dit terwyl sy in ’n donker, nat huis staan, sonder lig, sonder papier, sonder pen. Dit sê baie oor hoe min begrip daar is vir haar omstandighede.
Premier Winde het later aangesluit, maar in plaas daarvan om kalmte te bring of hulp aan te bied, het hy begin vra of die huis privaat besit word of deur die regering voorsien is. Miskien is daardie vrae later belangrik, maar nie wanneer ’n ouma en kinders in gevaar is en hulle huis besig is om onder water in te sak nie.
Wat Firdous nodig gehad het, was eenvoudige woorde soos: “Moenie bekommerd wees nie, ons stuur nou hulp.” Of: “Hou net bietjie vas, ons is saam met jou.”
Maar sy het dit nie gekry nie.
Sy het koue antwoorde gekry, sy het beleidspraatjies gekry. Sy het die tipe reaksie gekry wat wys hoe ver ons leiers van gewone mense se swaarkry af is.
Die gebeure van gister het meer as net water blootgelê, dit het die ware gesig van ons provinsiale en stadsleiers gewys.
Wanneer ’n ouma van Manenberg paniekerig en hulpeloos in haar huis sit, in die donker, saam met haar kleinkinders, is daar geen plek vir politiek of tegniese vrae nie. Daar moet net medemenslikheid wees.
Nigel en die luisteraars het hul bes probeer.
En daarvoor sê ons dankie.
Maar die hartseer bly – Firdous het beter verdien – Baie beter.
Wat dink julle?
Het ons leiers die toets geslaag – Of het hulle hul rug gedraai op mense soos Firdous?
Laat weet ons – jou stem maak saak.-
