Jong Rugbyspeler se Toekoms Verwoes 🏉🏉🏉

Gesin Soek Antwoorde 

Verslaggewer – George April

HOPEFIELD:- Die Esau-gesin van Hopefield is in rou en woede gedompel, ná ‘n voorval wat die toekoms van hul 22-jarige seun, Justin Esau, onherroepelik verander het.

Justin het Donderdag ‘n nege uur lange nekoperasie in Groote Schuur-hospitaal ondergaan, nadat ‘n gewas agter sy nek weer begin groei het, volgens sy ma, Elzaan Esau.  Dit was reeds die tweede groot operasie sedert sy deelname aan ‘n rugbywedstryd vroeër vanjaar.  ‘N wedstryd waarvoor hy, volgens sy ouers, deur die bestuur van Universals Rugbyklub op Hopefield gedwing is om te speel, ten spyte van ‘n bestaande besering.

“My seun se hele toekoms is vernietig,”  ‘n diep ontstelde Elzaan aan CCN vertêl, met trane in haar oë.  Volgens haar het Justin reeds in ‘n vriendskaplike wedstryd sy nek en skouer beseer. Hy het tuis probeer aansterk en duidelik laat weet, dat hy nie sou speel voordat hy nie volkome herstel het nie.  Hy het ook nie aan oefensessies deelgeneem nie.

Maar, sê sy, kort voor die span se vertrek na ‘n liga-wedstryd, is hy op straat voorgekeer deur die klub se voorsitter en afrigter.  Hulle het hom glo net versoek om saam te ry en die wedstryd te kyk nie om te speel nie.  Hy het uiteindelik ingestem, en sy ouers was nie by die huis om die situasie te keer nie.

“Kort voor daardie storie dieselfde oggend, was dieselfde mense by ons huis, en Justin het dit duidelik gemaak dat hy nie gaan speel nie.”  “Ek het saam met hom gestem, en gesê dat hy nie eers ge-oefen het nie, hoe kan hy dus speel.”

Op die wedstryddag het sake egter vinnig verander.  Justin is skielik meegedeel dat hy wel moet speel, syy nek is deur die klub se bestuur toegedraai, en ondanks sy eie beswaar dat hy nie reg voel nie, is hy oorreed om as voorspeler die volle 80 minute aan die eerstespan wedstryd deel te neem.

“Niemand het na hom geluister nie,” sê sy ma moedeloos. “Nou lê hy in die hospitaal, en niemand van daardie klub steek selfs sy kop in by ons huis nie. Geen ondersteuning, geen belangstelling nie.

En as ons hom wil besoek, moet ons dit uit sy pa se sak betaal.”

Volgens die gesin het Justin eers verlede jaar met rugby begin en selfs aan die einde van die seisoen ‘n prys ontvang as flank-speler. Vandag lê hy egter in die hospitaal met ‘n onseker toekoms.

CCN het reeds verlede maand ‘n formele navraag aan Boland Rugby Unie en SA Rugby gerig oor die voorval. Tot op hede is daar egter geen reaksie of terugvoer van die betrokke liggame nie.

Die voorsitter van Universals Rugbyklub, Archie Kleinsmith, het op vrae van CCN gereageer, maar sy weergawe van die gebeure strook duidelik nie met die hartseer relaas van die Esau-gesin nie.

Gemeenskapslede  van Hopefield met wie CCN verslaggewer oor die jongman se besering bespreek het, het hulle teleurstelling met die optrede van die klub bestuur uitgespreek.   Almal hou asem op vir antwoorde, en vir geregtigheid vir Justin Esau.