Oor aanval op Swartklipweg Pompstasie – 22 Augustus 2025
Berig – George April
KAAPSTAD:- Die Stad Kaapstad het die opsetlike beskadiging en plundering van die Swartklipweg Pompstasie in Tafelsig ten sterkste veroordeel.
Ná die verwydering van onwettige elektrisiteitskoppelings, het lede van die gemeenskap die fasiliteit aangeval en miljoene rand se noodsaaklike infrastruktuur gestripp en die pompstasie heeltemal buite werking gestel.
Hierdie roekelose daad plaas duisende inwoners van Mitchells Plain nou in gevaar van voortdurende riooloorvloeiings, met ernstige gesondheids- en omgewingsgevolge.
Volgens die Stad was die aanval ’n direkte wraakaksie teen die wetlike afdwingingsproses om gevaarlike onwettige elektrisiteitskoppelings te verwyder. Hierdie koppelings het pompversteurings veroorsaak, riooloorlope tot gevolg gehad en selfs brandgevare geskep. Die Stad beklemtoon dat ’n deeglike proses gevolg is, insluitend gesprekke met die gemeenskap, wyksraadslede en ander rolspelers, voordat die koppelings uiteindelik verwyder is.
Verslae dui daarop dat sekuriteitswagte tydens die aanval gedreig is en moes ontruim. Dit het aanvallers kans gegee om toegang te kry en alle CCTV-verbindinge sowel as die kragtoevoer wat die pompe laat werk, te vernietig. Intussen is onwettige koppelings weer aan die Stad se elektrisiteitsnetwerk verbind. Die Stad beplan nou verdere aksie om dié onwettige heraansluitings te verwyder en die pompstasie weer aan die gang te kry.
As gevolg van die sabotasie kan Mitchells Plain en omliggende gebiede ernstige rioolprobleme ervaar, aangesien die pompstasie nie meer die vloei kan hanteer nie. Dit hou groot gesondheids- en omgewingsrisiko’s vir die gemeenskap in.
“Hierdie daad van wraak ondermyn die Stad se volgehoue pogings om betroubare sanitasiedienste te verseker en openbare gesondheid te beskerm. Dit is uiteindelik die inwoners van Tafelsig en Mitchells Plain wat die swaarste getref word,” lui ’n verklaring van die Stad.
Die Stad Kaapstad doen ’n dringende beroep op inwoners om met inligting vorendag te kom wat kan help om die oortreders vas te trek. Enigiemand wat inligting het, kan die Stad se tolvrye nommer 0800 11 00 77 skakel. Indien die inligting lei tot ’n arrestasie of die terugvordering van gesteelde eiendom, kan ’n beloning van tot R100 000 toegeken word. Die identiteit van informante sal streng vertroulik gehou word.
Die Stad vra ook dat inwoners help om kritieke rioolinfrastruktuur te beskerm. Solank die pompstasie buite werking is, gaan riooloorlope meer gereeld voorkom en duur herstelwerk verg. Die Stad sê hulle bly verbind tot samewerking met die gemeenskap om volhoubare, wettige oplossings te vind – maar samewerking en beskerming van noodsaaklike dienste is van kardinale belang.
