HOPEFIELD:- Die behuisingskrisis in Hopefield bly ‘n groeiende bron van frustrasie, veral vir die gesinne wat al jare in haglike asbeshuise oorleef.
Hulle is nou vasgevang tussen politieke beloftes, gebrek aan grondsekerheid, en die komplekse wetlike raamwerk rondom onwettige grondbesettings.
Verlede jaar het die Saldanhabaai Munisipaliteit, onder beheer van die DA en VF Plus, probeer om inwoners van hierdie asbeshuise onwettig uit te sit. Sommige inwoners is selfs aangemoedig om eienaarskap van hul ongesonde strukture te aanvaar, ‘n gevaarlike stap, veral aangesien baie van hierdie mense nie hul regte of die wetgewing verstaan nie. Uit desperaatheid het sommige ingestem.
Intussen wag talle inwoners, sommige al vir tot 15 jaar, vir die geleentheid om ‘n ordentlike huis van die staat te ontvang. Tot op hede is daar egter geen tasbare terugvoering of konkrete planne van die munisipaliteit oor beskikbare opsies vir hierdie mense nie.
Die Hopefield Gemeenskap Forum het onlangs ‘n skrywe aan raadslid Miranda Schrader gerig, met die versoek dat sy in ‘n oop gemeenskaps vergadering die behuisings kwessies kom verduidelik. Tot dusver het sy egter nie eens die ordentlikheid gehad om te reageer nie. Intussen, met die komende munisipale verkiesing wat nader kruip, word onwaarhede en gerugte wyd versprei om politieke voordeel te trek.
Straatpraatjies, aangevuur deur politieke rolleerders, lui dat die regering eers in 2027 nuwe huise in Hopefield gaan oprig. Dit ten spyte van die feit dat die huidige boekjaar reeds in 2026 eindig, en die nasionale regering self erken het dat daar tans geen beskikbare fondse vir nuwe behuisingsprojekte is nie.
Wat die situasie verder kompliseer, is die algemene verwarring en gebrek aan kennis oor sogenaamde “onwettige plakkers” en “grondbesetters”. In ‘n onlangse sosiale mediaplasing aan inwoners, is die volgende verduidelik:
Wat is Jou Regte
– Baie mense is steeds grootliks oningelig oor die kwessie van onwettige plakkers en hul keuse van blyplek.
– Eenvoudig gestel: jy, ek, of enige owerheid kan nie sommer net ‘n plakker/grondbesetter verwyder of wegjaag nie. Dit geld ongeag of dit privaat grond, nasionale, provinsiale of plaaslike regeringsgrond is.
– Die ENIGSTE manier om ‘n plakker wettig te verwyder, is deur die howe, ‘n lang (jare), duur (tienduisende rande uit belastingbetalers se sakke) proses, sonder die waarborg dat ‘n uitsettingsbevel toegestaan sal word.
– Hierdie realiteit is gebring deur ‘n vorige regering en die sogenaamde PIE-wet.
– Wanneer jy dus sien hoe ‘n plakkerstruktuur opgerig word of ‘n publieke ruimte geokkupeer word, rig jou frustrasie waar dit hoort.
– Deur kos of goedere aan mense op straat of by verkeersligte te gee, word die probleem vererger.
– As jy werklik ‘n verskil wil maak, gebruik eerder ‘n erkende skenkings, of voucher stelsel.
– Meld enige onwettige grondbesettings by 021 480 7700 aan vir rekorddoeleindes en sodat daar konstruktiewe dialoog tussen betrokke partye kan plaasvind.
#feitemaaksaak. #speeljourol
“Dis maklik om voor verkiesing leë beloftes te maak, maar die gemeenskap verdien feite, oplossings, en respek, nie net politieke spel en uitstel nie,” sê ‘n inwoner wat verkies om anoniem te bly.
Cape Coast News sal die publiek op hoogte hou, sodra amptelike terugvoeriñg ontvang word, wat beslis nie gaan gebeur nie.