Verslaggewer – George April
Hopefield:- Die hoërskool-onderwyskrisis op die Weskus raak by die dag groter, en ouers sê die Wes-Kaapse Onderwysdepartement (WKOD) kan nie langer swyg nie.
Verlede week het inwoners van Laingville, St. Helenabaai, vir die derde keer betoog om ’n plaaslike hoërskool in die gemeenskap te eis. Thyrone Williams, plaaslike Good PR-raadslid, het vandag sy frustrasie op Facebook gedeel nadat dit bekend geword het dat uit drie Graad 8-klasgroepe by St. Helenabaai Primêr, slegs ses leerders vir 2026 aanvaar is by die vier hoërskole in Vredenburg.
Williams blameer die WK en die DA-regering vir die krisis en sê die party stel nie die kinders se toekoms eerste nie.
Maar die probleem strek veel verder. In Hopefield word daagliks minstens vyf busse vol kinders van omliggende dorpe na Hopefield Hoërskool vervoer, omdat ander skole reeds vol is. Dit laat Hopefield se eie kinders in die knyp, en baie word uitgedruk na Vredenburg, Moorreesburg, Malmesbury en selfs so ver as Porterville – waar kinders net Maandae en Vrydae vervoer word.
Vir ouers wat nie die koste van vervoer of verblyf kan dra nie, beteken dit dat hul kinders eenvoudig sonder skool sit en op straat rond dwaal.
Die probleem is al herhaaldelik onder die WKOD se aandag gebring. Hoewel die departement soms op mediavrae reageer, sê gemeenskappe dat daar nog geen konkrete plan op papier is om die krisis op te los nie.
Inwoners waarsku dat as daar nie dringend ingryp word nie, die Weskus ’n generasie jongmense gaan verloor wie se toekoms weggeneem word deur ’n gebrek aan toegang tot onderwys.
CCN het nie vir hierdie skrywe WKOD genader om kommentaar te lewer nie.
