Media verklaring
Mitchells Plain:- ‘N man is deur die Mitchells Plain Streekhof tot lewenslange tronkstraf gevonnis, nadat hy skuldig bevind is aan tien aanklagte van verkragting van sy swaer se minderjarige dogter.
Die misdrywe het begin toe die kind net ses jaar oud was en het oor byna nege jaar voortgeduur.
Die hof het ook beveel dat sy naam opgeneem word in die Nasionale Kinder beskermings register én die Nasionale Register vir Seksuele Oortreders. Hy is verder onbevoeg verklaar om met kinders te werk of ’n vuurwapen te besit.
Volgens aanklaer Sergio Lorenzo Goff het die eerste verkragting plaasgevind, toe die kind se ouers en die beskuldigde se vrou by ’n kerkfunksie was. Hy het haar na hul wendyhuis geroep, haar ontklee en verkrag. Daarna het hy haar herhaaldelik misbruik, selfs by sy werk, en haar gedreig om stil te bly.
Die waarheid het uitgekom toe die slagoffer haar skool se versorger vertel het dat die beskuldigde haar aan haar borste en privaat dele geraak het. Dit het tot ’n polisieondersoek gelei.
Tydens die verhoor het die beskuldigde ontken en beweer sy familie het hom “ingelê” oor ’n gesinskonflik. Sy vrou, wat die slagoffer se suster is, het hom probeer verdedig, maar erken onder kruisondervraging, dat sy en haar man die hofgetuienis vooraf bespreek het.
Goff het gesê die beskuldigde het geen berou getoon nie en die kind se lewe verwoes. “Sy het haar onskuld verloor aan iemand wat sy as haar eie boeta vertrou het,” het hy gesê.
Adv. Nicolette Bell, Direkteur van Openbare Vervolgings in die Wes-Kaap, het die vonnis verwelkom en die ondersoek- en vervolgingspan geprys vir hul toegewyde werk. “Hierdie uitspraak stuur ’n duidelike boodskap dat geregtigheid vir kinders altyd beskerm sal word,” het sy gesê.
Media woordvoerder: Eric Ntabazalila – Nasionale Vervolgingsgesag, Wes-Kaap