Verslaggewer – Isaac Cloete
NABABEEP:- Ongekende belangstelling het vandag op Nababeep geheers terwyl die polisie die woning van n vermiste seuntjie deursoek het.
Foto Verskaf – David Waterboer.
Dit is die ouerlike woning van David Waterboer, wat in 2025 net spoorloos verdwyn het.
Nababeep-inwoners het vertel dat hulle Woensdag bewus geword van die vele polisie-beamptes by genoemde woning.
En toe begin die gonsery, dat die forensiese afdeling en speurders opsoek was vir moontlike leidrade wat met die verdwynimg van David verband kan hou.
Kapt Ivan Magerman, die polisie-segspersoon op Springbok het gesê dat dit n normale polisie-ondersoek was voortspruitend uit David se verdwyning op 7 Februarie, 2025
“Die Namakwa-taakspan was besig met roetine-ondersoeke by die Waterboer-woning in Nababeep.
“Hierdie is voortdurende polisie-ondersoeke na die verdwyning van David Waterboer in Februarie 2025.
“Die gemeenskap sal met inligting opgedateer word soos die ondersoek ontvou.
“Die polisie is bewus van die gemeenskap se bekommernisse en versoek dat hulle die polisie toelaat om hul ondersoek voort te sit, leidrade te ondersoek en op te volg.”
Nababeep-inwoners het steeds met verskeie teorieë na vore gekom, waarom die polisie juis nou dié week die Waterboer- woning gaan fynkam het. Voorts hoop hulle dat daar uit eindelik konkrete en geloofwaardige inligting na vore sal kom, om David se raaiselagtige verdwyning te help oplos.
Intussen is n kerkdiens vir David gereël vir Saterdagaand, 7 Februarie, 18:00. Op hierdie datum sal David presies n jaar vermis wees.
Die heilige mis sal by die Rooms-Katolieke kerk, Nababeep, plaasvind. Inwoners word versoek om kerse te bring en wit te dra.
