Die afgelope week het n groot storieverteller sy tydelike tuiste met die ewige gewissel.
Verslaggewer – Isaac Cloete
SPRINGBOK:- Oom Arno van Zyl (82) van Springbok het die Vrydag in Kaapstad gesterf, nadat hy ook vroeër n beroerte gehad het.
Soos sy groot vriend, wyle Tolla van der Merwe, word van Zyl beskou as een van die land se groot storie-vertellers.
Van Zyl se storievertellery kom ‘n lang pad aan. Sover terug soos die 1950’s toe hy as knapie geluister het na die kostelike en humoristiese staaltjies van die Scheuders (sy ma se familie).
“Ek kon my verluister aan my oom se stories.
“Party die waarheid, ander weer opgemaak en ander weer nader aan die waarheid, maar lekker ingevul met inligting wat die waarheid was,” het hy op n stadium gesweer.
Hy was op Garies gebore, waar hy ook as n opgeleide onderwyser skoolgehou het. Nadat hy prokureur geword het, het hy op Springbok gewoon.
Dit was tydens hierdie periode dat hy bekendheid verwerf het met die unieke wyse van storie-vertelling. Veral sy stadige en bedeesde manier hoedat hy met sy Namakwalandse dialek stories kon oordra, sal nog vir lank onthou word.
Nadat hy in 1988 op televisie verskyn het, as gaskunstenaar op, Spies en Plessie-met
Permissie, het hy alombekend geword. Hiervoor was hy baie dankbaar teenoor Johan Stemmet (Noot vir Nootfaam) wat hom aan Ollie Viljoen bekend gestel het.
Die res is gekiedenis, want hierna het hy opgetree in tv-geselsprogramme soos, So staan die manne en Maak ‘n las.
In 2006 het sy eerste boek, Die lang pad terug, verskyn. Dit bevat hoofsaaklik verhale van Namakwaland-sommige vreksnaaks of met ‘n humoristiese inslag.
Tydens n onderhoud in 2009, het Van Zyl (ewe droog) oor sy boek gesê:
“…maar op ‘n dag het ek besef dat hierdie goed sulke juweeltjies is dat dit behoue moet bly.”
In sy later jare het hy ook op die televisie reeks, OppieStoep, sy komiese staaltjies met verskeie storievertellers soos Alan Hughs, n ander Namakwalander van Nababeep, gedeel. Asook antie Katriena van Kuboes. En natuurlik Lyntjie Jaars (nou mede-aanbieder van OppieStoep)
En terwyl huldeblyke en veral medelye van orals instroom, rou die Noord-Kaap en veral Namakwalandse mense oor hul gevalle Grootgees.
Baie bestempel hom as een van die Springbok-omgewing se groot trekpleisters, n ambassadeur, mense-mens, kuktuur-uitstraler, grapjas, ensovoorts.
Ja, n seder wat nie weer sal opstaan nie, maar sy stories sal bly voortleef, soos die waaigeluide van die suid-oostewind in Namakwaland.
Pietman Geldenhuys, aanbieder van OppiStoep, is Van Zyl se skoonseun.
Hy het hartroerend gesê: “Dankie vir pa se rigting wys, kennis deel, humorsin, saamsing, vuurmaak, blomme-kundigheid, Namakwa-passie en argumente.
Foto verskaf.
