Werker van Checkers Sterf in Diens
Verslaggewer — Isaac Cloete
SPRINGBOK:- Personeel van Checkers in Springbok is steeds geskok na die vreemde dood van ‘n werker hier oor die naweek.
Foto verskaf – Chriselda Bezuidenhoudt van Vaalhoek, Okiep.
Volgens betroubare inligting het die ongeluk Saterdag gebeur voor die winkel sou toemaak.
n Bron het gesê dat n dame, wat as skoonmaker by Checkers gewerk het, vroeër hierdie dag tragies gesterf het, nadat ‘n winkelrak op haar geval het.
“Sy het vermoedelik n aanval gekry en toe aan die winkelrak gegryp om haar balans te behou.” Die slagoffer was op die toneel deur mediese personeel dood verklaar.
Die Springbok SAPS het die voorval bevestig en gesê dat dit ondersoek word.
Volgens kapt Ivan Magerman, polisie- woordvoerder, het die voorval by n plaaslike voedselwinkel teen ongeveer 16:55, gebeur.
“Daar word beweer dat die vroulike werknemer haar balans verloor het en in ‘n poging om haarself te stabiliseer, het sy na ‘n rak gereik. “Ongelukkig het die rak meegegee en op die vrou geval, wat tot haar dood gelei het. Die slagoffer is op die toneel deur mediese personeel dood verklaar.
Intussen is die slagoffer geidentifiseer as die 42-jarige Chriselda Bezuidenhoudt van Vaalhoek, Okiep. Medelye stroom steeds in na haar vreemde sterfte wat soos n soort fratsongeluk vir sommige mense begin lyk.
Heidi Stone, takbestuurder van Checkers kon nie vir kommentaar bereik word nie, ten spyte van oproepe en boodskappe aan haar.
Enige persoon met inligting kan sersant Arno Heyns kontak by 082 495 5258 of alternatiewelik die SAPS MISDAADSTOP NOMMER 086001011 skakel.
