“Einde van ‘n era – Desiree Ellis vertrek kontrakloos ná Banyana-terugslag”
Berig –George April
Kaapstad:- ’n Goue era in Suid-Afrikaanse vrouesokker staan op die punt om tot ’n einde te kom.
Dr. Desiree Ellis, hoofafrigter van Banyana Banyana, sal glo binnekort haar rol verlaat ná die span se vroeë uitskakeling uit die WAFCON 2024-toernooi. Wat dié nuus nóg meer skokkend maak, is die onthulling dat Ellis sedert haar suksesvolle afrigting van die nasionale span sonder ’n formele kontrak gewerk het. Ondanks die talle prestasies wat sy behaal het, insluitend om Banyana na hul eerste WAFCON-titel in 2022 te lei – is daar volgens bronne nooit ’n behoorlike kontrak onderteken nie.
“Dis verstommend dat ’n vrou met soveel toewyding, wat die span tot ongekende hoogtes geneem het, steeds sonder ’n amptelike ooreenkoms moes werk,” lui een aanlyn reaksie op X (voorheen Twitter).
Sosiale media het vinnig gereageer:
“Dr. Desiree Ellis is ‘n nasionale skat”. “Om haar só te behandel is ’n skande vir SAFA en sportleierskap in ons land.” – @SoccerFanZA
“Jare se harde werk, ’n kontinentale trofee, en steeds nie eens ’n kontrak nie? Sy verdien beter.” – @LeboSport
Ellis, wat self ’n voormalige speler is en al sedert 2016 by die span betrokke is, het gehelp om ’n goue generasie in vrouesokker te ontwikkel. Onder haar leiding het Banyana internasionaal naam gemaak en kwalifiseer vir die Wêreldbeker.
Wat nou?
Dit bly onduidelik of Ellis amptelik bedank het, en of daar interne druk was om haar posisie te heroorweeg ná die teleurstellende WAFCON-resultate. SAFA het nog geen formele verklaring uitgereik nie. Hierdie moontlike afskeid kom op ’n kritieke tyd vir vrouesport in Suid-Afrika, waar die roep om erkenning, regverdige behandeling en professionele bestuur harder as ooit gehoor word.
Het jy ’n mening oor hierdie ontwikkeling?
Laat weet ons in die online kommentaar of stuur ’n e-pos aan CCN, na editor@ccnews.co.za
Foto – Dr. Desiree Ellis & Span Foto / Google.com
