HOPEFIELD: – Die families van Charlie Pellis en Gavin Pietersen, wat in Augustus 2024 in Oyster Place, Atlantis wreed doodgeskiet is, doen ’n dringende beroep op gemeenskappe om hulle te steun.
Berig- George April
Twee verdagtes is in verband met die moorde in hegtenis geneem.
Hulle het Vrydag in die Atlantis Landdroshof verskyn waar die saak uitgestel is tot Woensdag, 20 Augustus 2025, wanneer die beskuldigdes borgtog aansoek gaan doen. Een van die verdagtes, Adrian Davids, het reeds kort voor die hof verskyning voor ’n regter gestaan. Die tweede verdagte, wat tans in die Malmesbury Gevangenis aangehou word op ’n onverwante klag, sal nou saam met Davids as mede-beskuldigde die hof in die saak van moord en roof in die gesig staar.
Families vra: “Geen borgtog!”
Die families van die slagoffers, waaronder Gavin Pietersen se familie wat in Bloemstraat, Hopefield woon, het die afgelope naweek begin om in hul gemeenskappe petisies te versprei. Hierdie petisies het ten doel om borgtog vir die beskuldigdes te verhoed.
Volgens die families is dit ondenkbaar dat die verdagtes vrygelaat sou kon word, terwyl die herinnering aan die grusame skietdood van die twee jong mans nog vars is. “Ons vra nie net vir onsself nie, maar vir die hele gemeenskap se veiligheid,” het ’n familielid gesê.
Gemeenskap word opgeroep
Die families vra dat inwoners van Atlantis, Hopefield en omliggende dorpe saamstaan en die petisies onderteken. Elke handtekening sal help om ’n duidelike boodskap aan die hof oor te dra, dat die gemeenskap hierdie misdaad ernstig opneem en dat geregtigheid vir Charlie en Gavin geskied.
“Ons kinders se lewens is wreed weggeneem. Dit is ons plig om te keer dat die verdagtes weer terug op die strate kom,” lui die beroep.
CCN doen ’n beroep op almal wat glo in geregtigheid om die families van Charlie Pellis en Gavin Pietersen te ondersteun deur die petisies te teken.
Saam kan ons ’n verskil maak.
