CNN Verslaggewing
MITCHELLS PLAIN:- Die Wes-Kaapse. polisiediens het ’n klopjag van stapel gestuur ná ’n bloedige middag in Mitchells Plain, waar vyf mense gister doodgeskiet en sewe ander gewond was.
Dit nadat verskeie skietvoorvalle wat vermoedelik met bendegeweld verband hou, plaasgevind het
Volgens inligting van die toneel het die eerste voorval omstreeks 12:30 in Beaconvallei plaasgevind, waar vyf mense by ’n snoepie geskiet is. Twee het op die toneel gesterf, en drie is met skietwonde hospitaal toe geneem.
Kort daarna, ook in Beaconvallei, is nog vier mense by ’n ander snoepie geskiet. Een persoon is dood en drie is gewond.
In ’n derde voorval, steeds in Beaconvallei, is nog ’n persoon geskiet en gewond.
Die geweld het egter nie daar gestop nie. In Tafelsig en by die Town Centre is nog twee mense onderskeidelik in afsonderlike skietvoorvalle dood.
Volgens die polisie word al hierdie insidente verbind aan bende-aktiwiteite. Sake van moord en poging tot moord is geopen, en speurders van die Anti-Bende-Eenheid is besig met die ondersoek.
Intussen is daar bykomende sigbare polisiëring en gesamentlike operasies in die gebied ontplooi om verdere geweld te voorkom. Geen arrestasies is tot dusver gemaak nie, maar die soektog na die verdagtes duur voort.
Bron: SAPD _ www.saps.gov.za
