MOORREESBURG – Die formele borgtogaansoek van twee polisielede van Moorreesburg, wat aangekla is van die beweerde verkragting van ‘n 27-jarige vrou van dieselfde dorp, is Maandag uitgestel tot Woensdag, 5 Maart.
Die beweerde misdaad het op 8 Februarie 2025, plaasgevind, en die twee beskuldigdes is eers, Saterdag 15 Februarie, in hegtenis geneem. Hulle het vir die eerste kere in die Moorreesburg hof verskyn op 17 en 18 Februarie.’
N Uitkenningsparade is Maandagoggend, voor die hof verskyning, gedoen, waartydens die klaagster glo die twee mans positief geïdentifiseer het as diegene wat haar verkrag het. Later die middag het die beskuldigdes vlugtig in die hof verskyn voordat hul borgtogaansoek na Woensdag 5 Maart uitgestel was. Betroubare bronne dui aan dat DNS-bewyse nog nie beskikbaar is nie, wat moontlik tot die uitstel van die borgtogproses gelei het.
Gemeenskap erg verdeeld oor borgtog
Dit is egter die inwoners van die Swartlandse dorp wat Maandag die meeste aandag getrek het. Soveel as 900 inwoners het petisies onderteken ten gunste van borgtog vir die twee beskuldigdes, terwyl omtrent dieselfde getal tekenaars borgtog ten sterkste teenstaan.
Cap Coast News het Dinsdagoggend mense van Rosenhof in Moorreesburg op straat gepols oor hul mening oor die borgtogaansoek.
“Ek stel nie belang in die saak nie,” was die antwoord van die eerste vrou, terwyl twee ander vroue verkies het om stil te bly en geen kommentaar te lewer nie.
“As die polisie ernstig is om misdade soos verkragting te veroordeel, veral deur hul eie lede, sal daardie twee nie borgtog kry nie,” het ‘n man gesê, ‘n mening wat deur twee vriende beaam is.
Openbare veroordeling van polisie vergrype
Die aanklagte teen die twee polisielede plaas weereens die kollig op misdade wat deur wetstoepassers gepleeg word. Die gemeenskap spreek hul misnoeë uit oor die skynbare patroon waar polisielede, wat veronderstel is om burgers te beskerm, self ernstig aangekla word van misdade.
’n Verslag deur die Instituut vir Rasseverhoudinge (IRR) wys daarop dat sekere lede van die Suid-Afrikaanse Polisiediens (SAPD) gereeld betrokke is by ernstige misdade, insluitend gewapende roof, verkragting en selfs moord. Dit beklemtoon die dringende behoefte aan herstrukturering en sterker interne aanspreeklikheid binne die polisie.
Die publiek veroordeel enige vorm van misdaad, maar veral dié wat deur polisielede gepleeg word, aangesien dit nie net hul geloofwaardigheid ondermyn nie, maar ook die regstelsel in sy geheel. Die gemeenskap van Moorreesburg wag in spanning om te sien hoe die hof hierdie saak hanteer en of geregtigheid sal seëvier.
— Cape Coast News
