IPID ondersoek voorval

CCN Verslaggewing

BELLVILLE:-  Die Onafhanklike Polisieondersoekdirektoraat (IPID) het ‘n ondersoek ingestel na die dood van ‘n 42-jarige man wat Donderdag, 23 Julie 2026, tydens ‘n polisie-operasie in Bellville gesterf het.

Volgens die Suid-Afrikaanse Polisiediens (SAPD) het lede van die Openbare Orde Polisie (POP), wat deel vorm van Operasie Lockdown3, op inligting gereageer oor die beweerde besit van ‘n ongelisensieerde vuurwapen, ammunisie en dwelms by ‘n woning in Parksig Villas.

Met toestemming om die perseel te betree, het polisielede die woning deursoek. Tydens die soektog is ‘n ongelisensieerde vuurwapen met ammunisie, 258 Mandrax-tablette en ‘n hoeveelheid vermoedelik kristalmetamfetamien (“tik”) gevind en as bewysstukke gekonfiskeer.

Die SAPD sê die man het na bewering ongesteld geraak en inmekaargesak terwyl hy in hegtenis geneem is. Polisielede het onmiddellik mediese hulp ontbied. Paramedici het op die toneel opgedaag en gepoog om hom te resussiteer, maar hy is ongelukkig op die toneel dood verklaar.

‘n Strafsaak rakende die beweerde besit van ‘n ongelisensieerde vuurwapen, ammunisie en dwelms word ondersoek.

Soos deur prosedure vereis, ondersoek IPID nou onafhanklik die omstandighede rondom die man se dood tydens die polisie-optrede.

Die SAPD het beklemtoon dat alle sterftes wat tydens polisie-optrede of in polisie-aanhouding plaasvind, aan onafhanklike toesig onderwerp word om die feite vas te stel.

Bron: Suid-Afrikaanse Polisiediens (SAPD).