Derde aanval wek vrees
Berig – George April
KALBASKRAAL:- Inwoners van Kalbaskraal is in ’n toestand van vrees en woede nadat Oswell Tieties (24) Sondagaand, 18 Mei, brutaal aangerand is en daarna in die kattebak van ’n motor geforseer en weggevoer is.
Shafiek Dreyr, ook bekend as “Fiekie word gesoek vir ‘n Kalbaskraal jongman wat eers aangerand en toe blykbaar ontvoer was.
Sedertdien is daar geen spoor van hom nie, en die gemeenskap eis antwoorde.
Volgens ’n plaaslike gemeensklapsleier, Chief Henry Haas, is hierdie die derde aanval op jong mans in die gebied wat glo verbind word aan dieselfde verdagte. Henry het vertel dat die vermeende aanvaller, Shafiek Dreyr, ook bekend as “Fiekie”, tans hof toe gaan in Malmesbury vir ’n vorige aanval op ’n ander jong man in Kalbaskraal.
“Dis asof daar geen geregtigheid is nie, ons kinders word geteiken en dan gebeur daar niks,” het Henry aan Cape Coast News (CCN) gesê.
Henry het ’n foto op die CCN WhatsApp-groep gedeel van die vermeende verdagte en gesê dat Dreyr gesoek word vir die verdwyning van Oswell. Volgens hom is Oswell deur Dreyr na ’n sekere plek gelok en toe wreed met ’n mes aangerand, vermoedelik met die hulp van ander plaaslike inwoners. Ná die aanval is Oswell glo in die kattebak van ’n silver Mercedes geplaas en weggevoer. “Niemand weet egter wat die registrasie nommer van die voertuig was nie,” het Henry op navrae reageer.
Oswell Tieties (24) word gesoek.
Die enigste leidraad tot dusver is ’n foto van ’n bloedplas, wat Henry in ’n private gesprek met CCN gedeel het.
Die foto was glo op die toneel van die aanval geneem.
Die Malmesbury-polisie is tans besig om die verdwyning van Oswell te ondersoek, maar CCN het besluit om nie weer navraag te doen nie, ná herhaalde pogings in die verlede geïgnoreer is.
Die familie van Oswell Tieties asook die hele Kalbaskraal-gemeenskap verkeer in spanning, omdat niemand weet of hy nog leef nie.
Die publiek word dringend gevra om enige inligting rondom Oswell se verdwyning, of die verdagte aan die Malmesbury-polisiekantoor deur te gee.
Enige leidraad kan van kardinale belang wees om hom op te spoor en geregtigheid te laat geskied.
Foto van Mercedes – Oswell was in ‘n soortgelyk motor ontvoer.
