Verslaggewing – CCN Nuus
Weskus:- Die hoop op ’n eie huis brand sterk in die harte van duisende inwoners van die Weskus Distrik, maar té dikwels word hierdie hoop aangevuur deur beloftes wat nie op beplanning of begroting gegrond is nie.
CCN het ondersoek ingestel na die werklike vooruitgang van behuising in die vyf munisipaliteite, binne die Weskus Distriksmunisipaliteit; Swartland, Saldanhabaai, Bergrivier, Cederberg en Matzikama.
🏠 Beplanning & Werklikheid Per Munisipaliteit.
Bergrivier (Piketberg, Porterville, ens.)
Bergrivier is tans die enigste munisipaliteit in die distrik waar behuisingsprojekte aktief aan die gang is. Inwoners van Piketberg en Porterville het onlangs huise begin ontvang onder die huidige provinsiale begroting vir 2024/2025. Volgens beskikbare inligting is verdere fases beplan vir voltooïng teen vroeg 2026.
Swartland (Malmesbury, Moorreesburg, Darling, ens.)
Swartland het beplande projekte wat in die 2025/2026-boekjaar moet afskop, mits die goedgekeurde begrotings van die Wes-Kaapse Departement van Menslike Nedersettings gerealiseer word. Prioriteitsgebiede sluit Malmesbury en Kalbaskraal in, maar presiese datums vir begin is nog nie bevestig nie.
Saldanhabaai (Saldanha, Vredenburg, Hopefield, ens.)
Geen aktiewe projekte is tans aan die gang in SBM nie, maar daar is verwagtinge dat in die 2026/2027-boekjaar nuwe goedkeurings vir huisbou kan plaasvind, maar veral in Vredenburg en Langebaan. Hopefield is onder herbeskouing vir toekomstige ontwikkeling, maar geen fondse is tans bewillig nie.
Cederberg (Clanwilliam, Citrusdal, ens.)
Behuising in Cederberg sit reeds lank vas. Daar is geen befondsde projek vir 2024/2025 nie, hoewel die munisipaliteit ‘n versoek ingedien het vir grond ontwikkeling teen 2026. Tot op hede is dit slegs op papier.
Matzikama (Vredendal, Lutzville, ens.)
Matzikama het projekte wat moontlik in 2025/2026 sal afskop, indien hul aansoek om behuisingsubsidies goedgekeur word. Fokus sal waarskynlik op Vredendal wees. Maar weereens, geen werkskontrakte is nog toegeken nie.
BEGROTING & WAARSKUWING
Die Wes-Kaapse regering het sowat R2.4 miljard in hul 2024/25-begroting vir menslike nedersettings geoormerk, waarvan ’n gedeelte aan die Weskus Distrik gaan. Maar hierdie geld moet versprei word oor baie projekte, van grond ontwikkeling tot elektrisiteit en water vir nuwe huise.
Waarskuwing aan inwoners:
Wees versigtig vir politieke beloftes wat nie deur amptelike begrotings en beplannings dokumente gesteun word nie. Gemeenskappe kry dikwels hoop op grond van toesprake en besoeke, maar as daar geen tender, goedkeuring of begrotingslyn bestaan nie, is dit nie ‘n bevestigde projek nie.
Laat weet vir CCN waar jy bly en of daar in jou gebied bewerings is rondom behuising, ons doen die navorsing namens jou!
CCN Nuus – Gemeenskap – Waarheid – Verantwoordbaarheid.