Polisie het aanvanklik geweier om saak oop te maak
Kaapstad – 30 Augustus 2024
’N jong vrou se aand uit saam met ’n vriendin in die Kaapstadse middestad, het Maandagaand in ’n nagmerrie ontaard toe sy glo deur vier mans gedwelm, aangerand en brutaal groepsverkrag is.
Volgens inligting is die slagoffer in ’n donker systraat ingelei waar die mans haar ernstig aangerand het. Haar vriende, wat besef het sy is skielik weg, het haar selfoon opgespoor en haar later in die straat gekry, bebloed, gekneus en bewusteloos. Sy is onmiddellik hospitaal toe geneem waar dokters ernstige beserings bevestig het, insluitend orgaanskade, inwendige bloeding en ’n harsingskudding. Sy het eers die volgende aand bygekom.
Die familie se eerste poging om die voorval by die Kaapstad Sentrale Polisiekantoor aan te meld, is skokkend van die hand gewys. Beamptes het glo gesê: “Hierdie dinge gebeur elke dag.”
Die gesin het egter nie opgegee nie en het weer teruggegaan. Eers daarna is die saak ernstig opgeneem en ’n ondersoek ingestel.
Vroue vir Verandering (Women For Change) sê hulle is geskok oor die voorval en die aanvanklike weiering om ’n saak oop te maak. Volgens die Wet op Seksuele Misdrywe (Wet 32 van 2007) is groepsverkragting ’n ernstige oortreding, en ingevolge Artikel 51 van die Strafregwysigingswet (Wet 105 van 1997) is die minimum vonnis lewenslange tronkstraf.
“Geen vrou behoort sulke geweld te verduur bloot omdat sy ’n aand wil uitgaan saam met vriende nie. Dit is onaanvaarbaar dat die polisie aanvanklik nie ’n saak wou oopmaak nie,” sê die organisasie.
Hulle dring daarop aan dat die owerhede vinnig en deurslaggewend optree, en dat sulke misdade nie langer afgemaak of geminag word nie.
“Ons eis geregtigheid!”
#vrouevirverandering #unburythetruth #aminext #Kaapstad
Krediet: Women For Change
#vrouevirverandering #unburythetruth #aminext #Kaapstad
Krediet: Women For Change