Verslaggewer – Isaac Cloete
SPRINGBOK: – Die waaksaamheid en vinnige optrede van lede van die Delta Peloton van Springbok Openbare Orde Polisiëring tussen 20 en 21 Oktober 2025, het gelei tot die inhegtenisneming van ’n 44-jarige man en die beslaglegging van ’n groot hoeveelheid beskermde plantspesies.
Volgens die polisie was die lede op voetpatrollie in Springbok se sentrale sakekern, toe hulle die verdagte by ’n vulstasie in Voortrekkerstraat gearresteer het. Die arrestasie het plaasgevind tydens ’n roetine-stop-en-deursoekingsoperasie, waar die man gevind is met verskeie plante wat in ’n SASKO-meelsak versteek was binne sy reissak.
Die waarde van die beskermde plante word as aansienlik beskryf. Die verdagte sal binnekort in die Springbok-landdroshof verskyn.
Brigadier Schalk Andrews, distrikskommissaris van Namakwa, het die lede geloof vir hul waaksaamheid en gewaarsku dat die polisie sy pogings sal verskerp, veral namate die feestyd naderkom.
“Ons sal nie toelaat dat die smokkel, vervoer of handel in beskermde fauna en flora voortduur nie. Die polisie is vasberade om alle vorme van misdaad, insluitend dwelms, onwettige vuurwapens, gesteelde goedere en ander verbode items, te bekamp deur beslissende optrede en noue samewerking met gemeenskappe,” het brigadier Andrews gesê.
Plaaslike inwoners het hul misnoeë uitgespreek oor die voortgesette stropery van Namakwaland se unieke plantegroei.
“Welgedaan! Namakwaland word kaal gestroop en die verwoesting (maar net een nagevolg) word eksponensieel versnel. As mense maar net sal besef dat die stroping van ons plante ook die einde van toerisme-inkomste tot gevolg kan hê,” het Nicky Markram-Morris op sosiale media geskryf.
Nog ’n plaaslike inwoner, Xhánti Koi, het bygevoeg:
“Expose the corrupt and greedy.”
