CCN Verslaggewer – George April
Laaiplek:- In ‘n reeks suksesvolle operasies as deel van die #SaferFestiveSeason-veldtog, het die Suid-Afrikaanse Polisie Diens (SAPD) in die Weskus en in Kaapstad toegeslaan teen dwelmhandel en onwettige vuurwapens.
Hierdie aksies beklemtoon die polisie se vasberadenheid om gemeenskappe veiliger te maak tydens die feestyd. Op Woensdag het lede van die Laaiplek-polisiestasie inligting opgevolg oor dwelms by ‘n perseel in Aristea-straat, Noordhoek. Tydens ‘n deursoeking van die huis is sewe pakkies met kokaïen ontdek, en ‘n 25-jarige man is in hegtenis geneem op aanklag van die besit van dwelms.
By ‘n ander perseel in dieselfde straat, het polisiebeamptes die huis deursoek en 50 mandrax-tablette asook twee pakkies dagga gekonfiskeer. ‘N volwasse man is gearresteer vir die besit van dwelms.
Die verdagtes sal vandag (Donderdag) in die Velddrif-landdroshof verskyn. CCN sal terugvoering gee aan lesers, sodra inligting ontvang word wat in die hofsaak gebeur het.
In ‘n onverwante saak in Leon Court, Ottery, Kaapstad, het lede van die #AntiGangUnit inligting ontvang oor vuurwapens in ‘n voertuig. Hulle het die inligting opgevolg en die voertuig verlate aangetref. Tydens ‘n deursoeking is twee 9mm-pistole met ammunisie onder die passasiersitplek gevind. Die ondersoek na die ontdekking van die voertuig en die vuurwapens duur voort.
Hierdie operasies vorm deel van die breër pogings om dwelms en wapens van die strate te verwyder.
Bron: Amptelike SAPD-verklaring
(CCN Online – Jou betroubare bron vir brekende nuus)
#fightingcrime #gunsoffthestreets #drugsoffthestreets