En leiers wat Stilbly of Beledig
CCN Redakteur – George C April
Hopefield:- Die riethuisie by die biblioteek val uitmekaar, en dit is nie net ’n ou gebou nie.
Dit is ’n stuk erfenis wat opgerig is om die geskiedenis van bruin mense op die oudste dorp aan die Weskus te bewaar.
Ek is self 70 jaar gelede in so ’n huisie gebore en het daarin grootgeword. Daar was nooit standbeelde vir ons nie. Hierdie struktuur moes daardie gaping vul. Nou staan dit as ’n skande.
Ek het jare lank die kanale gevolg. Skrywes aan Saldanha Baai Munisipaliteit. Stories in die media, selfs die Cape Argus. Sedert Gayton McKenzie as Minister van Sport, Kuns en Kultuur aangestel is, het ek verskeie formele navrae en skrywes gestuur. Nie een antwoord nie. Absolute stilte. Dieselfde stilte toe ek as stigter van West Coast Sports Solutions aangedring het op sportgeleenthede vir kinders op die oudste dorp aan die Weskus.
In plaas daarvan kom ’n sogenaamde plaaslike PA-leier of lidmaat, of watter rol sy ook al in die PA se plaaslike tak speel, Isabelle Hendricks op Facebook en val my aan met beledigings. Ek het slegs ’n foto sonder kommentaar op Facebook geplaas.
Toe skryf Martha Julies: “DA maak die huisie reg. Kyk hoe hartseer is die huisie.” Ek het gereageer met: “Martha Julies, dis eintlik die PA-leier Gayton McKenzie se portefeulje, maar hy verskyn net verkiesingstyd…”
En toe breek die hel los.
Hendricks probeer die saak afmaak asof dit net ’n munisipale instandhoudingskwessie is wat niks met die minister se portefeulje te doen het nie. Sy praat van “kla op Facebook” en “kontak die regte mense”, terwyl sy self nie eers die geskiedenis of die simboliese waarde van die huisie verstaan nie. Sy verdedig haar president sonder om eers te weet waarom die struktuur daar staan.
Dit is nie leierskap nie. Dit is arrogante, voorbarige optrede op ’n publieke platform.
Intussen is die werklikheid genadeloos.
Teen die einde van hierdie maand verloor meer as 100 mense hul werk by die Elandsfontein-myn hier op Hopefield. Ons sit reeds met ’n werkloosheidsyfer van byna 80%, met kinders wat die skool verlaat omdat ouers nie die R1 350 per maand vir vervoer kan bekostig nie. Dwelms en sigarette rook onder bruin kinders het normaal geword, want hoop is skaars. Die enigste verskil met die Kaapse Vlakte, is dat die daaglikse moorde hier nog nie daardie skaal bereik het nie.
Direkte boodskap aan Minister Gayton McKenzie:
Die verkiesing is nou verby. Die plakkate is af. Die beloftes is gemaak. Nou sit ons kinders vas met ondersteuners van die Patriotic Alliance wat hulself leiers in ons gemeenskap noem. U kantoor het my skrywes en navrae oor die riethuisie en oor sportontwikkeling vir hierdie gemeenskap onbeantwoord gelaat. U eie plaaslike leiers reageer met beledigings op openbare platforms in plaas van kennis of deernis.
Is dit die PA-leierskap wat ons kinders moet aanvaar? Leiers wat nie antwoord nie, of wat eerder die boodskapper aanval as om die erfenis, die werkloosheid en die hopeloosheid onder ons kinders ernstig op te neem? Die verkiesing is verby. Gaan die stilte van u kantoor bly? Die 80% werkloosheid bly. Die meer as 100 mense wat hul werk gaan verloor, bly. En ons kinders moet nou “aanbeweeg” met leiers wat op die grond clueless is.
- Die riethuisie is ’n simbool.
- Die stilte van u kantoor is ’n simbool.
- Die openbare beledigings is ’n simbool.
- Maar die ekonomiese krisis wat hierdie dorp tref, is die harde werklikheid.
Hierdie storie is nie net oor ’n huisie nie. Dit is oor ’n gemeenskap wat toekyk hoe sy erfenis vergaan, hoe sy kinders hoop verloor, en hoe sommige leiers eerder stilbly of beledig as om die waarheid te konfronteer.
– CCN hou dit op rekord.
– Die feite staan.
– Die stilte ook.
“Isabelle Hendricks se openbare Facebook-profielprent”
