Berig – George April
Van Rhynsdorp – Die gemeenskap van Van Rhynsdorp is geskok oor ‘n ernstige klag wat ingedien is teen ‘n plaaslike hoërskool, na beweerde gevalle van boeliegedrag, fisiese aanranding en onbehoorlike dissipline deur skoolpersoneel.
Die voorval het wyd reaksie uitgelok en het nou die aandag van wetstoepassing owerhede getrek.
Volgens die polisie-woordvoerder, Kaptein FC van Wyk, is ‘n algemene saak van aanranding geopen ná ‘n voorval wat tussen 3 Maart 2025 om 08:00 en 7 Maart 2025 om 14:00 tydens klas plaasgevind het. Berigte dui daarop dat ‘n onderwyser ‘n 14-jarige leerder in die klas met ‘n stok geslaan het, nadat hy glo grappies oor haar handskrif gemaak het terwyl sy langs hom gestaan het. Die leerder het die voorval by die skoolhoof aangemeld, maar volgens haar familie is daar nie doeltreffend opgetree nie.
Die ma van die leerder het reeds ‘n formele klag by die polisie ingedien en dring aan op ‘n deeglike ondersoek. Tot op hede is niemand in hegtenis geneem nie, en die ondersoek duur voort. Kaptein Van Wyk het versoek dat die gemeenskap en betrokke partye die ondersoekbeampte toelaat om sy taak ongehinderd uit te voer.
Benewens die polisieklag, is ook ‘n skriftelike klag ingedien by die Wes-Kaapse Onderwysdepartement (WCED) en die Suid-Afrikaanse Menseregtekommissie. Daar word steeds gewag op ‘n formele reaksie van beide instansies rakende die bewerings en hoe die situasie hanteer gaan word.
Hierdie is nie die eerste voorval van beweerde mishandeling en boeliegedrag by die betrokke skool, wat onder die aandag van die media gebring is nie. Die gemeenskap eis nou duidelike optrede en ‘n aksieplan om seker te maak dat leerders veilig is en regverdig behandel word.
Cape Coast News sal hierdie saak fyn dophou en verdere opdaterings gee soos die ondersoek vorder.
