Polisie soek inligting oor Skieters
Berig – George April
EERSTERIVIER: – Die gemeenskap van Meltonrose, Eersterivier is diep geskok ná ’n skietvoorval Dinsdagaand waarin ’n vyfjarige seuntjie en ’n 32-jarige man gewond is.
Volgens die polisie het die skietery net voor middernag (omstreeks 23:45) plaasgevind in Tecomastraat, Palm Park. Die seuntjie was glo aan die slaap toe hy deur ’n koeël getref is. Teen Woensdagoggend het gerugte begin versprei dat die kind moontlik oorlede is, maar die Wes-Kaapse polisie het bevestig dat beide slagoffers steeds in die hospitaal behandel word.
Die Kleinvlei-polisie het op ’n oproep gereageer en by hul aankoms die twee gewonde slagoffers op die toneel aangetref. Hulle is onmiddellik na ’n nabygeleë hospitaal vervoer vir verdere mediese sorg. Volgens AO Joseph Swartbooi, polisiewoordvoerder, het twee onbekende gewapende verdagtes vermoedelik meervoudige skote uit ’n voertuig afgevuur voordat hulle van die toneel gevlug het.
“Die motief agter hierdie aanval is nog nie bekend nie. Kleinvlei-polisie ondersoek tans twee aanklagte van poging tot moord,” het Swartbooi gesê.
Die polisie versoek enige persoon met inligting om Stop Misdaad te kontak by 08600 10111, of om anoniem inligting te deel via die MySAPS-app.
