Verslaggewer – Felicity Jooste
Weskaap:- Die naweek het landswyd sy eie deel van skok en hartseer gebring, van bendegeweld in die Wes-Kaap tot ’n tragedie tydens ’n sportbyeenkoms aan die Tuinroete.
Op Saterdag, 15 November 2025, is lede van die #AntiGangUnit na die Hill View-omgewing in die Muizenberg-polisie presink ontplooi te midde van die voortdurende bendegeweld in die area. In verskeie geïsoleerde voorvalle is vier vermeende bende verdagtes gearresteer vir die besit van ongemagtigde vuurwapens en ammunisie.
Die verdagtes sal vandag, 17 November 2025, in die Wynberg- en Mitchells Plain-landdroshowe verskyn om op hierdie aanklagte te antwoord.
Intussen het ’n hartseer voorval dié naweek in Mosselbaai tydens die Ironman-kompetisie die gemeenskap diep geraak.
Volgens polisie woordvoerder Chris Spies is twee mans, onderskeidelik 29 en 58 jaar oud, kort ná die aanvang van die wedloop uit die water gehaal.
Voorlopige inligting dui daarop dat albei as deelnemers beskou word. Die polisie het twee geregtelike doodsondersoeke geopen om die presiese omstandighede rondom hul dood vas te stel.
Die twee insidente, albei op een naweek, herinner weer daaraan hoe broos die lewe is, en hoe uiteenlopend die uitdagings is wat ons gemeenskappe daagliks trotseer.