– Verskeie onwettige vuurwapens van die strate af
CCN Verslaggewer – George April
RAVENSMEAD:- Die South African Police Service (SAPS) gaan steeds daadwerklik te werk teen bendebedrywighede landwyd.
Hierdie week het lede van #OPERATIONLOCKDOWN3 ‘n 33-jarige vermeende bendeleier in Ravensmead in hegtenis geneem op aanklag van die besit van onwettige vuurwapens en ammunisie. Die span het ‘n R5-geweer, ‘n haelgeweer, drie pistole, meer as 160 patrone ammunisie en verskeie magasyne in beslag geneem. Vier van die vyf onwettige vuurwapens se reeksnommers was afgevyl.
Volgens die polisie het die span vinnig op intelligensie gereageer wat daarop gedui het dat die verdagte die beheer oor die bende se vuurwapens gehad het. Die verdagte het self die span na ‘n versteekte kas met vuurwapens en ammunisie gelei wat naby ‘n woonstelblok in Ravensmead weggesteek was.
Alle inbeslag-genome vuurwapens sal nou ballistiese toetse ondergaan om vas te stel of dit in ander ernstige of geweldsmisdade gebruik is. Die 33-jarige verdagte sal binnekort in die Parow-landdroshof verskyn, terwyl die ondersoek voortgaan.
Hierdie suksesvolle operasie dra weer eens by tot die verwydering van gevaarlike vuurwapens van die strate en versterk die stryd teen bendegeweld in die Noordelike Voorstede.
#FightingCrime #GunsOffTheStreets #OperationLockdown3
