HOPEFIELD:- By die Hopefield Sopkombuis gebeur daar iets besonders, nie net word liggame gevoed nie, maar ook gees, vaardighede en selfvertroue. 
’N groep vroue van Oudekraalfontein en ander gemeenskapslede is besig om die eeue-oue kuns van weefwerk aan te leer, onder leiding van kunstenaar en ontwerper Ronelle van Zyl, met die ondersteuning van gemeenskapsleier Winnie. Hierdie projek is besig om mense te bemagtig, ’n gevoel van samehorigheid te versterk en nuwe ekonomiese moontlikhede oop te maak.
’n Eenvoudige Draad, ’n Sterk Gemeenskapsbinding
Die Hopefield Weefprojek, wat uit die Hopefield Sopkombuis gegroei het, is daarop gemik om weefvaardighede aan mense van alle ouderdomme en agtergronde oor te dra. Dit is ’n geleentheid waar deelnemers nie net nuwe tegnieke aanleer nie, maar ook selfvertroue opbou, kreatief uitdrukking gee aan hul idees, en uiteindelik ekonomiese geleenthede kan benut.
Elke Dinsdag tydens die Sopkombuis se voedingsure kom ’n groepie vroue byeen om met eenvoudige raam-weefstelle te begin oefen. Die doelwit is om hulle uiteindelik op groter, meer gevorderde looms te laat werk, sodat hulle items soos matte, komberse, klere en huisversiering vir verkoop kan produseer.
Verder het die projek ook ’n groot gemeenskapsraam geskep, wat by verskillende geleenthede in die dorp opgestel word. Hier kan enigiemand — van kinders tot volwassenes — ’n draad insit en deel word van ’n gesamentlike kunswerk wat die dorp se samehorigheid simboliseer.
Leermeesters met Hart
Ronelle van Zyl is ’n grafiese ontwerper en kunstenaar wat ná Covid van Kaapstad na Hopefield verhuis het. Sy het vinnig betrokke geraak by verskeie gemeenskapsprojekte, en haar passie vir kuns en tekstiele in diens van die gemeenskap begin stel.
Sy het reeds werkswinkels oor kuns en sianotipe-drukwerk in Hopefield en Paternoster aangebied, en haar werk was te sien by verskeie uitstallings aan die Weskus. In 2024 is sy bv. gekies om grootskaalse sianotipe-baniere en mobiele kunswerke vir die Hopefield Fynbos Skou te vervaardig.
Die tweede dryfkrag agter die projek is Winnie, ’n voormalige SAPD-offisier met jarelange ervaring in sosiale misdaadvoorkoming. Ná haar aftrede het sy die NGO Love Angels op die been gebring, en later die Hopefield Community Action-inisiatief saam met ander rolspelers gevestig.
Toe sy eerstehands gesien het hoe groot die behoefte aan voedingsondersteuning in die dorp is, het sy die Hopefield Sopkombuis begin — wat tot vandag toe honderde mense bedien.
Winnie se droom is om die sopkombuis verder uit te bou tot ’n volwaardige gemeenskaps- en handwerkssentrum, waar mense nie net kos ontvang nie, maar ook weer self-respek en lewensvreugde deur kreatiewe aktiwiteite kan herwin.
Toekomsdrome en volhoubaarheid
Die projek het reeds waardevolle skenkings ontvang, insluitend 6 weeframe en ’n spinwiel van lede van die Cape Weavers Guild, asook materiaal uit die breër gemeenskap.
Maar om werklik volhoubaar te wees, word daar tans aktief gekyk na moontlikhede vir volhoubare befondsing. Die droom is om ’n vaste ateljee en klein winkeltjie in Hopefield te vestig, waar toeriste en plaaslike besoekers die unieke handgeweefde produkte sal kan besigtig en aankoop. Daar word ook gedink aan ’n aanlyn winkel, soortgelyk aan suksesvolle modelle soos die Barrydale Hand Weavers, wat as inspirasie dien vir hierdie projek.
“Ons is besig om hoop en waardigheid saam te weef — draad vir draad, hand vir hand. Hierdie is ’n projek wat nie net kuns skep nie, maar lewens verander,” sê Ronelle.
Hoe kan u help?
Hoewel die projek reeds op dreef is, is daar steeds behoefte aan:
- verdere materiaal (garings, wol, gereedskap)
- ondersteuning vir werkswinkels en opleiding
- bydraes tot ateljee-rentekoste en projekbestuur
Enigiemand wat betrokke wil raak of meer wil weet, is welkom om met Ronelle van Zyl in verbinding te tree by: ronzyl@mweb.co.za.
By die Hopefield Weefprojek word elke draad deel van ’n groter storie van veerkragtigheid, gemeenskapsbou en hoop.
