Berig – George April
GUGULETHU:- In ‘n gesamentlike poging om bendeverwante geweld in die gebied hok te slaan, het wetstoepassers van die Stad Kaapstad se Law Enforcement Advancement Plan (LEAP) Saterdagaand ‘n belangrike deurbraak gemaak.
Tydens roetine-stop-en-deursoek-operasies in Gugulethu het LEAP-lede ‘n silwer Volkswagen Polo afgetrek nadat die bestuurder verdag opgetree het. Die voertuig het aanvanklik probeer wegjaag, maar beamptes kon die voertuig binne minute tot stilstand dwing.
By die deursoek van die motor is ‘n gelaaide aanvalsgeweer, vermoedelik ‘n R5, sowel as ammunisie, gevind. Beide die bestuurder en die passasier, albei mans in hul twintigs, is onmiddellik in hegtenis geneem en oorgelewer aan Gugulethu SAPD vir verdere ondersoek.
Volgens die Stad Kaapstad se burgemeesterskomiteelid vir veiligheid, JP Smith, is die gebruik van swaarwapens deur misdadigers ‘n toenemende bekommernis. “Die vuurkrag wat in die hande van bendes beland, plaas onskuldige lewens in gevaar. Ons sal aanhou om saam met SAPD en ander instansies te werk om hierdie wapens van die strate af te kry,” het Smith gesê.
Die beslaglegging volg slegs ure nadat sewe mense in ‘n skietvoorval in Gugulethu doodgeskiet is. Die polisie ondersoek of daar moontlike verbindings tussen die twee voorvalle bestaan.
Intussen het die Stad bykomende wetstoepassingshulpbronne na bekende bende- en afpersingsbrandpunte in die gebied ontplooi.
Die twee verdagtes sal binnekort in die Kaapstadse hof verskyn op aanklagte van die besit van ‘n onwettige vuurwapen en ammunisie, asook moontlike verdere aanklagte soos die ondersoek vorder.
– CCN Nuus
