Verslaggewing – CCN Nuusspan
Beaufort-Wes:- ‘N nuwe windkragprojek, die Khangela Emoyeni Windkragstasie, is tans aan die ontwikkel buite Beaufort-Wes en beloof om teen 2026 volhoubare energie aan een van Suid-Afrika se grootste nywerhede, Richards Bay Minerals, te lewer.
Die aanleg sal bestaan uit 32 reuse windturbines en het ’n kapasiteit van 144 megawatt – genoeg om tienduisende huishoudings van elektrisiteit te voorsien, al is die energie bestem vir industriële gebruik. Hoewel dit tegnies ’n mylpaal in hernubare energie vir die Wes-Kaap is, is plaaslike inwoners verdeeld oor die voordele vir die gemeenskap.
“Dis goed vir die omgewing, maar wat kry óns daaruit?” vra Michael Afrika, ‘n plaaslike inwoner van Merweville. “Die werkers kom van buite af, en min plaaslike mense het werk gekry op die projek. Ons hoop net die munisipaliteit dwing hulle om iets terug te gee aan Beaufort-Wes.”
Die projek is deel van Eskom se pogings om meer private rolspelers in te bring om die druk op die nasionale kragnetwerk te verlig. Die privaat ooreenkoms tussen Khangela Emoyeni en Richards Bay Minerals is vir 20 jaar gesluit, wat stabiliteit en beplanning moontlik maak vir albei partye – maar nie noodwendig vir plaaslike ekonomiese groei nie.
Volgens Lydia Damons, ‘n onderwyseres in Beaufort-Wes, is daar egter potensiaal: “As ons dit reg bestuur, kan hierdie projek jongmense inspireer om in hernubare energie te studeer. Maar dit sal hulp van bo af vat om dit werklik ‘n sukses te maak vir almal.”
Die ontwikkelaars het belowe om “omgewingsvriendelike beginsels” te volg en ’n “gemeenskapsontwikkelingsplan” te loods, maar die besonderhede van dié plan is nog nie ten volle bekend gemaak nie. “Ons moedig volhoubare ontwikkeling aan, maar dit moet insluitend wees,” het ’n woordvoerder van ’n plaaslike burgerregte-organisasie gesê. “Nie net vir die groot rolspelers nie, maar vir die mense van Beaufort-Wes ook.”
Die vraag bly dus – Gaan hierdie wind waai in die rigting van plaaslike voordeel, of net vir die nywerhede aan die ooskus?
Kyk uit vir opdaterings soos die projek vorder.
