Teen Onwettige Sigarette
Berig – Felicity Jooste
Colesberg:- ’N multidissiplinêre interprovinsiale operasie, waaraan lede van die Noord-Kaap, Wes-Kaap, Oos-Kaap en Vrystaat deelgeneem het, het Woensdag, 20 Augustus 2025, ’n groot deurbraak gemaak teen die handel en verspreiding van onwettige sigarette in en om Colesberg.
Volgens die polisie is die aksie geloods nadat inligting oor onwettige handel ontvang is. Lede van Colesberg SAPD, Kuyasa SAPD, Misdaadintelligensie en SARS Doeane het toe opgetree en ’n algemene handelaar in Kerkstraat, Colesberg, deursoek. ’n Lasbrief vir die deursoeking is verkry en uitgevoer, waarna smokkel-sigarette ter waarde van sowat R370 000 in beslag geneem is.
’n Vragmotor wat langs die winkel geparkeer was, het ook die aandag van die span getrek. By die deursoek daarvan is ’n verdere vrag smokkel-sigarette, met ’n geraamde waarde van R2,5 miljoen, gevind en gekonfiskeer. Die vragmotor is saam met die sigarette in beslag geneem.
Die operasie is daarna voortgesit by ’n vulstasie in Stasieweg, Colesberg, waar nog ’n klomp smokkel-sigarette, ter waarde van ongeveer R590 000, ontdek is.
In totaal beloop die waarde van die beslagleggings sowat R7,5 miljoen, insluitend die vragmotor.
Die polisie beklemtoon dat sulke gesamentlike operasies ’n sterk boodskap stuur dat onwettige handel nie geduld sal word nie.
#StopIllicitTrade
