En Plaaslike Indiensneming by Elandsfontein-myn
Hopefield:- Werkers by die Elandsfontein-fosfaatmyn en lede van die Hopefield-gemeenskap is toenemend gefrustreerd oor wat hulle as partydige en onkonsekwente behandeling van werknemers beskou, veral tussen senior personeel van Kropz en subkontrakteur Trollope en gewone werkers.
Cape Coast News het vroeg in Augustus ’n formele media-navraag aan beide maatskappye gerig oor ’n voorval op 19 Julie 2026. ’n Trollope-werker het volgens werkers ’n asemtoets by die hek misluk (“rooi geblaas”). Volgens die maatskappy se eie reëls behoort so ’n oortreding tot onmiddellike ontslag te lei.
Die man is deur sekuriteit beveel om die perseel te verlaat, maar is later na bewering deur ’n vroulike kollega op die R45 opgelaai, in die agterkant van ’n voertuig weggesteek en terug die mynperseel op geneem.
Toe die saak later aan die lig gekom het, is die man slegs vir een week geskors en daarna weer toegelaat om te werk. Die vroulike werker het na bewering slegs ’n skriftelike waarskuwing ontvang. Werkers wys daarop dat ander werknemers in die verlede vir dieselfde of soortgelyke oortredings summier afgedank is.
Geen reaksie van maatskappye
Beide Kropz en Trollope is ’n volle geleentheid gegun om op die bewerings te reageer. Teen die sperdatum, en nou al weke later, het nie een van die twee maatskappye ’n antwoord verskaf nie. Hierdie stilswye laat nog meer vrae ontstaan oor deursigtigheid en konsekwente toepassing van dissiplinêre beleid.
Plaaslike werkers voel uitgesluit
Die situasie word verder vererger deur griewe oor plaaslike indiensneming. ’n Vroulike werker wat vrywillig bedank het nadat sy self ’n asemtoets misluk het, is na bewering belowe dat sy na ses maande weer kon aansoek doen. Ondanks verskeie oop poste by die myn, het sy tot dusver geen reaksie op haar aansoeke ontvang nie.
Verskeie Hopefield-inwoners sê hulle kry nie ’n regverdige kans wanneer hulle vir poste aansoek doen nie. Baie wys daarop dat selfs die Community Liaison Officer (CLO) nie van Hopefield is nie, en dat plaaslike mense gereeld oor die hoof gesien word.
Ironies genoeg is die man wat op 19 Julie “rooi geblaas” het en skelm terug die perseel opgeneem het, ook nie van Hopefield nie. Tog is hy na slegs een week se skorsing weer toegelaat om te werk.
“Dit voel of die reëls net vir sekere mense geld,” sê een werker wat nie geïdentifiseer wil word nie. “As jy nie die regte kontakte het nie, is jy uit.”
Patroon van beweerde onkonsekwentheid
Werkers sê die jongste voorval pas in by ’n wyer patroon waar dissiplinêre stappe selektief toegepas word. Hulle verwys na vorige gevalle waar sommige werkers streng gestraf is, terwyl ander vir soortgelyke oortredings ligter behandel is.
Cape Coast News het beide maatskappye weer om kommentaar genader. Teen publikasie het geen amptelike reaksie ingekom nie. Die stilte van Kropz en Trollope laat die gemeenskap en werkers met meer vrae as antwoorde.
Hopefield-inwoners sê hulle sal aanhou om regverdige behandeling en gelyke geleenthede vir plaaslike werksoekers te eis.
