Berig – Isaac Cloete
Noord-Kaap:- Die Springbok Openbare Orde Polisiëringseenheid (POPS) het Maandag 21 Julie weer hul ywer teen dwelmmisdaad bewys toe hulle ‘n 35-jarige man in hegtenis geneem het op aanklag van handel in dagga.
Polisiebeamptes het opgetree ná hulle inligting van ‘n informant ontvang het. Die verdagte is omstreeks 12:30 voor ‘n winkel in Springbok se hoofstraat gestop. Tydens ‘n deursoeking is ‘n pakkie dagga met ‘n geskatte waarde van R66 300,99 ontdek.
Die verdagte sal binnekort in die Springbok-landdroshof verskyn.
Brigadier Schalk Andrews, distrikskommissaris van die SAPD in Namakwa, het sy waardering uitgespreek vir die POPS-eenheid:
“Ons loof die POPS vir hul onwrikbare vasberadenheid om die ruimte vir misdadigers te verklein. Elke arrestasie is ‘n tree nader aan ‘n veiliger gemeenskap.”
Gemeenskap Reageer
Onder ‘n Facebook-plasing deur skrywer Isaac Cloete, het gemeenskapslede hul waardering uitgespreek:
Frank Klaasen skryf –
“Baie goed gedoen SAPD! Hierdie verdagte is nog net 35 jaar oud – in die jeug van sy lewe. Hy moes sy energie gebruik het om ‘n beter toekoms te bou – nie net vir homself nie, maar vir die gemeenskap waarin hy woon. Nou help hy om daardie gemeenskap af te breek met dwelms. Sit hom agter tralies , dalk leer hy iets daaruit.”
Anne Kleynhans –
“Wel gedaan Springbok SAPS.”
Boodskap vanaf ‘n CCN-leser
“Hoewel dagga wettig gebruik mag word onder sekere omstandighede, bly dit steeds onwettig om daarmee te handel – net soos met enige ander dwelm.
Gemeenskappe wat bewus is van onwettige dwelmtransaksies het ‘n morele en sosiale verantwoordelikheid om dit aan te meld – al help dit net om één lewe te red. Dwelms verwoes gesinne en ondermyn die toekoms van ons jeug.”
Navrae:
Kapt. Ivan Magerman
Kommunikasiebeampte – Namakwa Distrik
📞 083 478 9317
Foto – Sosiale media
