Berig – Isaac Cloete
Pofadder:- Die Namakwa Distrik Taakspan van die Suid-Afrikaanse Polisiediens (SAPS) het Woensdag, 13 Augustus 2025, in die vroeë oggendure ’n groot deurbraak gemaak.
Dit was tydens ’n gesamentlike Operasie, naamlik Shanela II in Pofadder. Die suksesvolle aksie het gelei tot sewe arrestasies en die beslaglegging van dwelms en kontant ter waarde van byna R50 000.
Volgens inligting wat deur die Namakwa Distrik Taakspan ingesamel is, is verskeie persele deursoek. Dit het gelei tot die arrestasie van drie mans, vermoedelik buitelanders tussen 32 en 38 jaar oud, en vier vroue tussen die ouderdomme van 20 en 75 jaar.
Die polisie het Tik, Mandrax en dagga gekonfiskeer met ’n geskatte straatwaarde van R49 969,71, asook kontant wat vermoedelik uit misdaad verkry is.
Distrikskommissaris, Brigadier Schalk Andrews, het die taakspan geloof vir hul uitstekende werk en het SAPD se verbintenis herbevestig om operasies te verskerp en misdaad in die distrik uit te roei.
Navrae:
Kaptein Ivan Magerman
Namakwa Kommunikasie beampte
📞 083 478 9317
📧 MagermanIC@saps.gov.za
