CCN Nuus
GANSBAAI:- Die brande wat Maandag in die Gansbaai- en Masakhane-gebied uitgebreek het, woed steeds hewig, met brand- en noodspanne wat op maksimum ontplooiing werk om die vuur onder beheer te kry.
Volgens die Overstrand Munisipaliteit word beide direk en indirekte blus tegnieke by die brande toegepas, ondersteun deur helikopters en ’n groot aantal grondspanne. Die brand in die Grootbos-gebied het rondom infrastruktuur beweeg, en is besig om in die rigting van die Koudevlakte te vorder. Ondanks die intensiteit van die vuur, slaag spanne daarin om dit binne vooraf bepaalde blokke te probeer hou, maar talle spot fires lei tot voortdurende uitdagings.
Die Masakhane-brand bly in één blok beperk, maar die omtrek word as “uiters warm” beskryf. Brandbestryders fokus daarop om die vuur te stabiliseer en te keer dat dit uitbrei.
’N groot hoeveelheid hulpbronne is ingestel, waaronder Overstrand Munisipale Brandweer, Overberg Distriksmunisipaliteit, FMU en plaaslike grondeienaars, goFPA, Leading Edge Aviation, Working on Fire (WOF), NCC, asook Overstrand Verkeer en Wetstoepassing.
Die Eskom-span is op die toneel en het verskeie afgebrande pale op beide die 66 kV- en 11 kV-lyne geïdentifiseer. Aanhoudende vuuraktiwiteit bemoeilik ’n volledige assessering van die skade, en daarom kan Eskom nog nie ’n beraamde hersteltyd verskaf nie.
Die R43 bly gesluit weens swak sig en gevaarlike omstandighede. Motoriste word versoek om alternatiewe roetes te gebruik totdat die pad veilig verklaar kan word.
Munisipale bestuurder Dean O’Neill het inwoners bedank vir hul geduld en versoek dat mense die gebied vermy om reddings- en brandbestrydingswerk nie te ontwrig nie.
