CCN Nuus
Kraaifontein:- Lede van die Kraaifontein Misdaad voorkomings eenheid, het in die vroeë oggendure van Sondag, 14 Desember 2025 omstreeks 01:30, vier verdagtes tussen die ouderdomme van 24 en 28 jaar in hegtenis geneem.
Dit nadat hulle in besit gevind was van ’n verbode vuurwapen, ammunisie en vermoedelik gesteelde eiendom.
Tydens die optrede is een 9mm-pistool sonder ’n reeksnommer, twee 9 mm-patrone, vier selfone en drie bank- of identiteitskaarte gekonfiskeer. Die polisie ondersoek of die items moontlik verbind kan word met ’n gewapende roof en ontvoering wat onlangs in Mfuleni plaasgevind het en tans onder ondersoek is.
Die vier verdagtes sal in die hof verskyn sodra hulle formeel aangekla is.
Afsonderlike voorval
In ’n onverwante voorval het ’n skietery op Saterdag, 13 Desember 2025 omstreeks 19:15 in Miltonweg, Scottsville plaasgevind. Met hul aankoms op die toneel het polisiebeamptes mans sien weghardloop in Midwaystraat. Een verdagte is gesien waar hy ’n voorwerp oor ’n heining in ’n erf gooi.
Die verdagte is kort daarna aangekeer en teruggeneem na die betrokke erf waar ’n deursoeking gedoen is. Beamptes het toe ’n silwer .38 Special Taurus-rewolwer met vyf patrone gevind.
Die volwasse man is in hegtenis geneem en by die Kraaifontein SAPD aangehou. Die vuurwapen is as bewysstuk ingeneem. Hy sal in die hof verskyn sodra hy aangekla is.
Verdere ondersoek het aan die lig gebring dat die vuurwapen in Junie 2025 as gesteel by Kamieskroon SAPD aangemeld is.
Die ondersoek duur voort.
