Goeie nuus vir sommige, maar ’n bitter werklikheid vir ons kinders en gemeenskappe.
HOPEFIELD: – Die nuwe vennootskap tussen Hopefield Rugbyklub en Phelan Green Group is goeie nuus, want dit wys hoe maatskappye in groen energie in die gemeenskap kan belê – ek is nie daarteen nie.
Maar ná meer as 18 jaar se harde werk om kinders en jongmense op te hef, en nou as ’n 70-jarige man wat steeds deur God se genade kan aangaan, kan ek nie langer stilbly nie. Groot maatskappye en besighede borg maklik rugbyklubs wat reeds toeskouers en inkomste trek. Dit is verstaanbaar vir advertensie en sigbaarheid. Maar dieselfde energie en ondersteuning ontbreek dikwels by jeugorganisasies, kleuterskole en NPO’s wat daagliks met ons kwesbaarste kinders werk, veral in bruin gemeenskappe regoor Suid-Afrika.
Kleuterskole kry nie befondsing vir selfs een eenvoudige uitstappie per maand nie. Hulle sukkel om kos te koop, onderwysers te betaal en met stygende kostes te oorleef. Ons jeug tussen 17 en 19 jaar oud, veral dié wat nie meer skoolgaan nie – sit sonder struktuur, geleenthede of hoop.
Die gevolge sien ons elke dag: dwelms, alkohol, tienerswangerskappe, geweld en misdaad wat ons kinders se toekoms steel.
Intussen het ek tydens besoeke aan die Saldanhabaai Munisipaliteit se kantore self waargeneem hoe bruin jongmense al hoe minder in kantoorposisies aangestel word. Dieselfde munisipaliteit het in Mei ons organisasie, West Coast Sports Solutions NPO , se versoek vir ’n dag van pret en plesier op die rugbyveld geïgnoreer, ten spyte van skrywes wat bewys het daar sou geen skade wees nie.
‘N talent-aand vir fondsinsameling is ook geweier, tog was dieselfde saal gratis gegee aan ’n organisasie van Kaapstad vir ’n soortgelyke geleentheid. Die mense het gekom, fondse ingesamel en teruggegaan Kaap toe, terwyl ons eie gemeenskap nie toegelaat word om ons kinders te help nie. Ek word persoonlik ge-target deur mense in senior posisies, omdat ek openlik opstaan vir die onregverdigheid teenoor ons bruinmense, en dit het niks met politiek te doen nie. Ons bruin gemeenskappe word sistematies van geleenthede ontneem om self ons kinders en jeug op te hef.
Ten spyte hiervan gaan ons by West Coast Sports Solutions NPO voort.
Ons beplan ‘n O/19 Rugby & Netball 7’s vir September, en is reeds deur ‘n organisasie uit Stellenbosh genader om deel van daardie dag te wees.
Ons beplan ook ‘n eerste; die Bloekomboomfees 2026 later in September/Oktober. Ons soek nie groot kontant nie – net praktiese hulp soos medaljes, trofeë of vervoer.
‘N boodskap aan alle gemeenskappe, veral ons bruin mense. “Word wakker- ons kinders sterf en word verlore terwyl ons toekyk. Maatskappye wat in solar, groen waterstof en groot projekte belê, wees konsekwent in julle gemeenskaps verantwoordelikheid.
Politici: hou op met leë beloftes en uitbuiting.
Media: lê die feite bloot.
En ons eie mense, ondersteun diegene wat probeer om ’n verskil te maak.
Ek is 70 jaar oud, deur God se wil kan ek nog baie doen. Maar soos baie ander wat probeer om ons kinders op te hef, word ons elke keer gekelder. Dit kan nie langer so aangaan nie, ons bruin kinders en jongmense verdien ’n regverdige kans om hul lewens op te bou.
West Coast Sports Solutions NPO – Ek het diè organisasie begin om ons kinders en jeug deur sport te probeer “uplift” maar ek word elke keer “gekelder” deur my eie mense wat die “vuilwerk” doen vir diegene wat in senior posisies sit in Saldanhabaai munisipaliteit – DIT MOET STOP
My sel no – Cell: 067 074 5040
