Berig:- George April
HOPEFIELD:- – ’N Gesin van Hopefield, wat vir jare ’n bestaan maak deur houtwerk, is gister deur wetstoepassers en ’n munisipale voorman gestop.
Uitvoerende Burgermeester: Andrè Truter – Foto – SBM website
Die rede?
Die omstrede skietbaan buite die dorp, wat twee jaar gelede gesluit is ná sterk gemeenskapsprotes, gaan weer oopgemaak word. Dit ten koste van dié gesin se enigste bron van inkomste.
Wat hierdie situasie besonder kommerwekkend maak, is dat die skietbaan nie deur plaaslike inwoners gebruik word nie, maar meestal deur mense van buite die dorp. Vir die inwoners van Hopefield voel dit soos ‘n herhaling van die onderdrukking van die verlede. ’N herbesoek aan die dae toe hul voorouers uit hul woonbuurt verwyder is en tussen die bosse met klei en riete moes oorbegin.
Die besluite oor hierdie ontwikkeling blyk weer eens geneem te word in die sogenaamde wit woonbuurt, sonder inklusiwiteit of deursigtigheid. Die mense van Oudekraalfontein voel vasgevang in ’n sisteem waar hul stemme stilgemaak word, en hul bestaansreg ondergeskik is aan buitestaanders se belange.
Die Hopefield Gemeenskaps Forum het Burgemeester Andre Truter van Saldanhabaai Munisipaliteit en DA-raadslid Miranda Schrader genooi om kern vrae van die gemeenskap in persoon te kom beantwoord, by ’n vergadering op Dinsdag 3 Junie om 18:00 in die Thusongsaal. Schrader het al twee keer soortgelyke uitnodigings van die hand gewys.
Truter, intussen, is sedert sy verkiesing in 2021 slegs eenmaal in die bruin woonbuurt van Hopefield gesien.
“Werkskepping en behuising voel soos ’n luukse wat net vir ’n geselekteerde dorpe beskikbaar is,” sê ’n inwoner.
“Wanneer gaan ons wakker skrik en besef,
Genoeg is genoeg?”
Nota van die redaksie:
CCN het nie amptelike media-navrae gerig aan DA-woordvoerders nie. Vorige pogings tot kommunikasie rakende gemeenskapsake is keer op keer geïgnoreer. Indien Andre Truter of Miranda Schrader belangstel om op hierdie verslag te reageer, is hulle welkom om ’n e-pos te rig aan: editor@ccnews.co.za.
