CCN Nuus
KAAPSTAD:- Die Wes-Kaapse polisie is besig om die omstandighede te ondersoek waaronder ’n liggaam Woensdagaand in Mitchells Plain ontdek is.
Volgens die polisie is die liggaam van ’n jong man in Dagbreekstraat gevind, in die sandduine bekend as die Westridge-duine. SAPD-lede het op die toneel gereageer nadat ’n klag ontvang is, waarna ’n moorddossier geopen is.
Polisiewoordvoerder, kapt. FC van Wyk, het bevestig dat die oorledene na raming in sy twintigs is.
“’N gemeenskap lid wat sy honde uitgeneem het, het ’n slegte reuk opgemerk en nader gegaan om te kyk. Hy het toe ’n hand uit die grond sien uitsteek en onmiddellik die polisie ontbied. ’N lykskouing sal bepaal wat die oorsaak van die persoon se dood is,” het van Wyk gesê.
Die polisie versoek enigeen met inligting om Crime Stop te skakel.
In ’n afsonderlike voorval het die man wat vroeër Woensdag in Oval Northstraat, Beacon Valley, geskiet is, helaas aan sy beserings beswyk.
Die polisie se ondersoek na die skietvoorval duur voort.