By woning van vermeende bendeleier
Verslaggewer – George April
BELLVILLE:- Die Bellville Suid woning van die vermeende bendeleier, Jerome Booysen, was vanoggend die teiken van ’n gewapende rooftog.
Volgens die polisie is ’n huishulp tydens die voorval deur ’n groep gewapende mans oorval en as gyselaar aangehou.
Polisiewoordvoerder, kaptein Frederick van Wyk, het bevestig dat die huishulp oorweldig is toe die verdagtes die perseel binnegedring het. Voorlopige inligting dui daarop dat die aanvallers toegang tot die eiendom verkry het nadat die hek oopgemaak is. Hulle het glo daarna deur ’n skuifdeur die woning binnegegaan.
Die huishulp is kort ná die verdagtes se aankoms vasgebind, terwyl die mans die huis deursoek het. Daar word vermoed dat die verdagtes op soek was na kontant en moontlik ’n kluis of stoorkamer geteiken het.
Geen verdere besonderhede oor die verdagtes of moontlike arrestasies is tans beskikbaar nie.
Die polisie ondersoek die voorval.