Verslaggewer – George April
Moorreesburg:- Inwoners op die Swartland dorp het vanoggend geskitter van vreugde, toe 21 gesinne uiteindelik hul nuwe huise ontvang het.
Volgens ‘n inwoner van die Rosenhof gemeenskap het mense al moed opgegee, maar uiteindelik is drome na 23 jaar se geduldige gewag, bewaarheid
Die huise is amptelik oorhandig deur Swartland Munisipaliteit se burgemeester, Herold Cleophas, tydens ’n dankbare en emosionele geleentheid.
Gemeenskapswerker Gary Lambrechts het die oomblik só opgesom:
“Dankie Vader, vandag kon ons Moorreesburg Gemeenskapleiers met trots sê, die onderhandelinge met Swartland Munisipaliteit was ’n groot sukses.
Na 23 jaar ontvang 21 gesinne vandag huise vanaf die Nasionale Regering. Baie dankie aan beide Swartland Municipaliteit en Nationale Regering vir hierdie huise.”
Verskeie rolspelers is geloof vir hul bydrae, onder meer Asla, PSC, Moorreesburg-leiers, raadslede, Swartland Munisipaliteit se amptenare en die burgemeester self.
Onder die nuwe huiseienaars was Johanna Pypers, ’n bejaarde inwoner wat vir dekades gewag het vir haar eie veilige plek om huis te noem. Sy het vanoggend met trane in haar oë in haar eerste huis ingestap, ’n oomblik wat volgens bure en gemeenskapslede “nie in woorde beskryf kan word nie”.
“Bewaar julle huise soos goud, dis julle eie plekkie in die son,” was die warm boodskap aan die nuwe eienaars.
Die atmosfeer was een van diepe dankbaarheid, trots en nuwe hoop vir die families wat nou met waardigheid en sekerheid vorentoe kan beweeg.
