‘n Moeder se trane en getuienisse van hoop en hartseer
Saldanha – Trane het gevloei in die hof toe Kelly Smith, die ma van die vermiste Joshlin Smith, Maandag emosioneel geraak het tydens haar voormalige werkgewer, Carlien Zeegers se getuienis.
Die hofsaal in die White City Multipurpose Centre was halfvol, maar die spanning en emosie was duidelik sigbaar. Smith, saam met Jacquen ‘Boeta’ Appollis en Steveno ‘Steffie’ van Rhyn, staan tereg op aanklagte van ontvoering en mensehandel. Die saak volg op die verdwyning van vyfjarige Joshlin op 19 Februarie 2024, toe sy in die sorg van haar ma se kêrel, Appollis, was.
Getuies neem die hof terug na die dag van Joshlin se verdwyning
Die hof het gehoor hoe Kelly Smith haar buurvrou, Namhla Tinzi, daardie aand gekontak het in ‘n desperate poging om haar dogter te vind. Tinzi het saam met haar gesoek, maar moes later huis toe gaan weens beurtkrag. Sy het nooit weer by die soektog aangesluit nie, aangesien sy die volgende dag moes werk.
Nog ‘n belangrike getuie, Natasha Andrews, het onthul dat sy besig was met die proses om Joshlin aan te neem toe sy verdwyn het. Volgens Andrews het sy gereeld na die kind omgesien en het sy gesien hoe Joshlin se ouers dikwels baklei en hoe haar ma se dwelmgebruik ‘n rol in haar lewe gespeel het. Sy het selfs beplan om Joshlin by haar polis in te sluit, sodat die kind ‘n beter toekoms kon hê indien iets met haar sou gebeur.
“Toe ek hoor Joshlin is weg, het my hart in duisend stukke gebreek,” het Andrews in die hof getuig. “Ek wou vir haar ‘n beter lewe gee.”
’n Moeder se stryd: Verslaaf, maar lief vir haar kinders
Hoewel Kelly Smith as ‘n gereelde dwelmgebruiker beskryf is, iemand wat selfs drie keer in rehabilitasie was, het verskeie getuies benadruk dat sy ‘n goeie ma was. Carlien Zeegers, vir wie Kelly gewerk het as ‘n huiswerker, het vertel hoe sy haar en haar kinders met kos en geld gehelp het.
“Ek het vir haar jammer gevoel. Ek is self ‘n ma, en ek kon sien hoe sy sukkel,” het Zeegers gesê.
Volgens haar het Kelly daardie oggend by haar aangekom met haar jongste dogter, Rochelle. Sy het vroeër die dag geld gevra om gas te koop en was later daardie aand weer by haar huis om vir Joshlin se foto’s te vra.
Onbeantwoorde vrae en ‘n pad na geregtigheid
Terwyl die hofsaak voortduur, bly daar steeds baie onbeantwoorde vrae. Waarom sou ‘n ma wat as ‘n “goeie moeder” beskryf word, haar kind toelaat om in sulke omstandighede te leef Waarom was sy net een keer deel van die soektog? En bowenal, waar is Joshlin?
Die saak word voortgesit, met Appollis en Van Rhyn steeds in aanhouding in Malmesbury, terwyl Kelly in die Langebaan polisiekantoor gehou word.
Vir nou bly hoop en geregtigheid die enigste lig in hierdie donker verhaal.
