VAN RHYNSDORP:- Nog ‘n ouer van Vanrhynsdorp het na vore gekom met ‘n ernstige klagte oor aanhoudende boeliegedrag teen haar dogter by ‘n plaaslike hoërskool.
Volgens haar word die leerder gereeld verbaal en fisies geteiken, terwyl die skool blykbaar niks doen om dit te stop nie.
Die ma beweer dat haar kind herhaaldelik blootgestel is aan beledigende en kru opmerkings, haar besittings beskadig of gesteel is, en dat sy selfs gestraf is toe sy haarself probeer verdedig het. Sy voel magteloos, aangesien haar versoeke om ingryping steeds geïgnoreer word.
Volgens haar is dit nie ‘n geïsoleerde geval nie, ander ouers het ook al klagtes oor soortgelyke gedrag ingedien. ‘n Onlangse mediaberig het reeds aandag gevestig op probleme by die skool, wat vrae laat ontstaan oor dissipline en leierskap.
Die ma gaan intussen ‘n formele klag by die Wes-Kaapse Onderwysdepartement indien en oorweeg verdere stappe indien daar nie spoedig ingryping is nie. Sy hoop dat die publikasie van hierdie saak gemeenskapsbewustheid sal verhoog en druk op die skool sal plaas om verantwoordelikheid te neem.
Die vraag bly, hoe lank moet kinders aan boeliegedrag blootgestel word voordat daadwerklike optrede volg?
Cape Coast News sal hierdie saak dophou en opdaterings verskaf soos dit ontvou.
