Terwyl Behuisingsprestasie in die Wes-Kaap Steeds Agterbly
CCN Nuusredaksie
HOPEFIELD — Terwyl die Wes-Kaapse regering homself graag as die “Beste Bestuurde Provinsie” in Suid-Afrika beskryf, vertel die werklikheid op grondvlak ’n heel ander storie.
In Hopefield, ’n klein gemeenskap binne die Saldanhabaai Munisipale gebied, leef 40 gesinne steeds in strukture bedek met gevaarlike asbes, sonder enige noemenswaardige vordering of plan van aksie om hul omstandighede te verbeter.
Lewe in Gevaarlike Geboue, Sonder Hoop
Die Hopefield Gemeenskapsforum doen ’n dringende beroep op plaaslike en provinsiale owerhede om daadwerklik op te tree. Intussen word gesinne, wat vir dekades in hierdie ongesonde strukture woon, nou onder druk geplaas om eienaarskap van hul huise te aanvaar deur sogenaamde “Kaart en Transport”- dokumente.
Hierdie oënskynlik administratiewe stap het verreikende gevolge: dit skuif die verantwoordelikheid vir onveilige behuising van die owerhede na die gemeenskap self, sonder dat enige strukturele opgraderings of ondersteuning gebied word. Buitendien kan inwoners se toekomstige reg op gesubsidieerde behuising daarmee in die gedrang kom, iets waarvan baie nie bewus is nie.
Val die DA-raadslid die gemeenskap in die rede?
Volgens plaaslike inwoners moedig wyksraadslid Marinda Sckrader inwoners aan om hul name op ’n waglys te plaas vir huise wat glo in 2026 gebou gaan word. Tog is daar tot dusver geen amptelike dokumentasie, goedgekeurde projekte, of begroting beskikbaar wat hierdie bewerings staaf nie.
Die Hopefield Gemeenskapsforum vra dus: Is dit belofte of blote misleiding?
Behuisingskrisis – Die Syfers Spreek
Volgens data uit ’n onlangse parlementêre antwoord deur die Wes-Kaapse LUR vir Infrastruktuur, Tertuis Simmers, is daar ‘n duidelike agteruitgang in die lewering van gesubsidieerde behuising:
2019/2020: 8 038 huise
2020/2021: 6 247
2021/2022: 6 191
2022/2023: 5 380
2023/2024: slegs 3 046
Terselfdertyd het die Wes-Kaapse regering meer as R800 miljoen in onbestede behuisingsfondse aan die nasionale regering teruggestuur oor die afgelope twee finansiële jare, geld wat gebruik kon word om duisende gesinne soos dié in Hopefield te help.
Gemeenskap Eis Antwoorde
Namens die Hopefield Gemeenskapsforum, rig ons hierdie openbare beroep aan raadslid Marinda Sckrader:
Hou ’n gemeenskapsvergadering om in die openbaar verantwoording te doen;
Verskaf konkrete bewyse van enige goedgekeurde behuisingsprojekte vir 2025;
Verduidelik waarom fondse nie aangewend word vir behuising in gemeenskappe soos Hopefield nie;
Neem aanspreeklikheid vir die toenemende wantroue en verwarring onder inwoners.
Beloftes – Genoeg is Genoeg
Ons mense het hul reg op veilige, gesonde en waardige behuising lankal verdien. Wat hulle nie meer kan bekostig nie, is valse hoop, politieke verskonings en onbesonne administrasie. Dis tyd vir aksie – regte oplossings, regte verantwoordbaarheid, en ’n regering wat werklik sy mense dien.
