Berig:- George April
Grabouw:- Die Gemeenskap Polisie Forum (GPF) spreek sy diepe afgryse en hartseer uit oor die gruwelike voorval, waarin ’n 9-jarige meisiekind van Gustrouw die slagoffer van verkragting was.
Hierdie weerlose kind is in haar eie gemeenskap, waar sy veilig moes wees, onmenslik aangerand. ’N daad wat die hele gemeenskap geskok en woedend gelaat het.
Twee verdagtes is in verband met die voorval gearresteer en het op Dinsdag, 22 April 2025, die eerste keer in die plaaslike hof verskyn. Die hof het besluit dat albei verdagtes in aanhouding moet bly tot vandag Donderdag, 24 April 2025.
Dis nie bekend of hulle formele borgaansoek goedgekeur was nie.
Die GPF, saam met die breër gemeenskap, eis geregtigheid vir die jong slagoffer. Ons spreek ons onwrikbare steun uit aan die gesin, en herinner die publiek daaraan dat misdade teen kinders nie net ’n misdaad teen ’n individu is nie, maar teen die hele samelewing.
Ons doen ’n ernstige beroep op inwoners om kalm te bly, maar ook waaksaam te wees. Enige inligting wat tot die suksesvolle vervolging van die verdagtes kan lei, moet dringend aan die SAPD gerapporteer word.
Kinderveiligheid is ons prioriteit, geen kind mag ooit deur sulke wreedheid gaan nie. Die GPF bly verbind daartoe om met alle rolspelers saam te werk om Gustrouw en omliggende areas veiliger te maak vir elke kind.
Saam staan ons teen geweld, saam veg ons vir geregtigheid.
