Onprofessionele Skeidsregters Vergal Die Spel
Berig – George April
HOPEFIELD:- Wanneer die “groen en pers” OUTsurance-skeidsregters opdaag op ’n Weskus-rugbyveld, word daar in die dorp gefluister: “Drink jou bloeddrukpille, die ref is terug.”
Foto – Google.com
Hierdie tong-in-die-kies waarskuwing dra egter ’n dieper waarheid, spelers, toeskouers en selfs onderwysers verloor vertroue in die integriteit van plaaslike rugbywedstryde.
Cape Coast News (CCN) het reeds in April verslag gedoen oor die Paastoernooi op Piketberg. Na die plasing van die berig, het verskeie klubs en toeskouers voice notes op CCN se WhatsApp-groep gedeel, waarin ernstige klagtes oor partydigheid en arrogansie van skeidsregters geopper word. ’n Velddrif-ondersteuner het byvoorbeeld gesê dat hul span uit die kompetisie geboender is weens “skeidsregters wat besluite geneem het wat eenvoudig nie sin maak nie.” Een so ’n insident het ingesluit ’n strafskop wat deur twee lynregters as mis aangedui was, teenstrydig met die waarneming van die skeidsregter.
In Moorreesburg het ’n O/19-wedstryd in ‘n klug ontaard, toe ’n OUTsurance-skeidsregter se hantering van die wedstryd, ouers en spelers woedend gelaat het. Volgens ‘n voice note het ’n skoolhoof selfs in frustrasie uitgeroep dat die man “artritis tot in sy boude” het, so swak was sy oordeel. “Spelers het self-begin vra, hoe blaas hierdie ref eintlik?” sê die nota. Die atmosfeer was so gespanne, dat ’n ontspanningsdag vir die kinders ontaard het in wantroue en woede.
Nog ’n voorval in Stompneusbaai het daartoe gelei dat ’n skolewedstryd glad nie kon begin in die twede helfde nie. ’n Skoolhoofde en afrigters het die skeidsregter versoek om die wedstryd regverdig te hanteer. Die ref se reaksie: “Ek is nie bang vir Boland nie, julle kan maar klagtes stuur, ek blaas die wedstryd soos ek wil.”
‘N woedende toeskouer het hom gekonfronteer met; “Ons betaal jou, moenie ons kinders se wedstryd verwoes nie.” Maar die skeidsregter het aangehou met sy arrogante houding, en die mense versoek om die veld te verlaat.
Die wedstryd is nooit weer begin nie.
Selfs afgetrede skeidsregters en afrigters het begin reageer. Een het met hartseer verwys na wyle Dr Danie Craven se woorde: “Rugby is ’n brugbouer – of jy bou vriendskappe, of vyandskap.” Hy het beklemtoon dat party skeidsregters geen selfrespek het nie, en dat hul gedrag op die veld verdeeldheid, frustrasie en selfs geweld aanmoedig. Die betrokke afrigter het ’n persoonlike verhaal gedeel van sy seun wat tydelik verlam was, volgens hom as gevolg van swak afrigting en swak skeidsregtering.
Sedert CCN se eerste berig is verskeie formele navrae aan Boland Rugby, SA Rugby en OUTsurance gestuur, maar tot dusver is daar geen reaksie ontvang nie, ten spyte van ’n redelike sperdatum van sewe dae.
Hierdie stiltes spreek boekdele.
Die tyd vir afskeep is verby. Boland Rugby Unie móét sy huis in orde kry. Die klagtes is nie geïsoleerd nie, hulle is wydverspreid en herhalend. Rugby se kernwaarde, respek, is in gedrang. En OUTsurance sal moet besluit of hulle hul naam wil verbind aan ’n kompetisie, waar skeidsregters blykbaar eerder speel as fluit.
