Polisie Stel Ondersoek In
CCN Nuus
Kaapstad – Die Wes-Kaapse polisie het bevestig dat hulle ‘n ondersoek van stapel gestuur het na die verdrinking van ‘n bejaarde egpaar by die Tafelbaai-hawe Woensdagoggend.
Volgens Kolonel Andrè Traut, woordvoerder van die polisie in die Wes-Kaap, is die liggame van ‘n man en vrou, vermoedelik in hul 70’s en van Poolse afkoms, omstreeks 08:15 deur polisie-duikers in die water naby die Cape Royal Yacht Club gevind.
’n Ondersoekdossier is geopen deur die Tafelbaai-hawe-polisie om die omstandighede rondom die voorval te ondersoek,” het Traut gesê. Hoewel dit nog die vroeë stadium van die ondersoek is, het die polisie bevestig dat daar geen vermoedens van kwaadwilligheid is nie.
“’n Geregtelike lykskouing sal uitgevoer word om die presiese oorsaak van dood te bevestig, alhoewel verdrinking tans as die waarskynlike oorsaak beskou word,” het Traut bygevoeg. Die identiteite van die egpaar word voorlopig weerhou totdat formele identifikasie gedoen is en hul naasbestaandes in kennis gestel is.
Die polisie het ‘n beroep op die publiek gedoen -enigiemand met inligting wat die ondersoek kan help, word versoek om Crime Stop by 08600 10111 te kontak.
