Berig – George April
HEIDEVELD:- ’N 32-jarige man van Heideveld is laat Dinsdagaand, 9 Julie, in ’n vlaag van koeëls doodgeskiet, terwyl hy in sy motor in Siriusstraat, Surrey Estate gesit het.
Foto – sosiale media
Die slagoffer is glo tot 21 keer geskiet en is op die toneel dood verklaar.
Brigadier Jayce Naidoo, polisiewoordvoerder en stasiebevelvoerder van Manenberg SAPD, het bevestig dat beamptes omstreeks 23:40 op die moordtoneel gereageer het.
“Die liggaam van ’n 32-jarige man is in die bestuursitplek van ’n motor aangetref, met veelvuldige skietwonde aan die bolyf. Volgens inligting op die toneel het die slagoffer in sy voertuig gesit toe hy deur onbekende aanvallers aangeval is,” sê Naidoo.
“Die verdagtes het herhaaldelik op hom geskiet voordat hulle gevlug het. ’n Saak van moord is geopen en die ondersoek duur voort. Daar is nog geen arrestasies gemaak nie.”
Die voorsitter van die Heideveld Gemeenskaps-polisiëringsforum (GPF), Vanessa Adrianse, het die moord bevestig, maar het gesê dat dit nog nie duidelik is of die voorval bendeverwant is nie.
“Die polisie ondersoek die saak, en daarom kan ons nie tans sê of dit bendeverwant is nie,” sê sy.
Enigiemand met inligting oor hierdie sinnelose moord word versoek om Manenberg SAPD by 021 699 9400 te kontak of Crime Stop by 08600 10111.
