Oor Sinnelose Moorde op die Kaapse Vlakte – “Dis Tyd dat Ons Stiltes Breek”
HANOVER PARK:- Die gemeenskap is in rou ná die wrede moord op Aunty Mary, ‘n geliefde ouma, ma, suster en buurvrou.
Haar dood het die gemeenskap diep geraak en veroorsaak dat leiers en inwoners hul stemme verhef teen die aanhoudende vlaag van misdaad en moord op die Kaapse Vlakte.
“Ons verloor daagliks onskuldige lewens. Aunty Mary was ‘n moederfiguur vir baie in die gemeenskap. Hierdie moorde is sinloos en vernietigend,” het ‘n plaaslike gemeenskapsleier gesê. “Dis tyd dat ons as gemeenskap opstaan – as jy iets sien of hoor, moet jy praat. Misdaad floreer wanneer goeie mense stilbly.”
Suid-Afrika het onlangs die tragiese titel gekry as een van die lande met die hoogste moordsyfer in die wêreld. Die realiteit op grondvlak, veral op plekke soos Hanover Park, Bishop Lavis, en Manenberg, is haglik: skote in die nag, vrees in die strate, en ‘n gevoel van magteloosheid by baie gesinne.
“Ons vra vir geregtigheid vir Aunty Mary en elke ander slagoffer wat sonder rede vermoor is. Die skuldiges moet vervolg word,” het ‘n ander inwoner gesê.
‘n Bewusmakingsoptog sal hierdie Saterdag om 15:00 plaasvind. Inwoners word versoek om saam te kom by die Nantis sokkerveld in Downburgweg, Hanover Park.
“Ons kan nie wag vir iemand anders om ons gemeenskappe te red nie. Dit begin by ons,” sê ‘n jong vrou van die gebied. “Kom stap saam – vir Aunty Mary en vir elke lewe wat verlore gaan het.”
Die tyd vir stilte is verby.
Kom ons kies lewe.
Kom ons kies geregtigheid.