Maar intimidasie duur voort
Deur CCN Nuus
Piketberg:- Na bykans tien maande van angs is die DA se Ray van Rooy, burgemeester van Bergrivier, uiteindelik vrygespreek.
Op 11 Desember 2024 is die burgemeester se huis skielik en sonder verduideliking deur die polisie deursoek. Die sogenaamde bewyse wat toe gekonfiskeer is, het volgens forensiese toetse geen spore van dwelms bevat nie. Die enkele koeël wat gevind is, is glo oud, verroes en onbruikbaar.
Met hierdie uitslag het die Suid-Afrikaanse Polisiediens (SAPD) die saak teruggetrek.
“Alles rondom hierdie saak lyk na ’n desperate en kwaadwillige poging om ’n hardwerkende burgemeester se naam te beswadder, hom uit sy amp te verwyder en sy reputasie te vernietig,” het DA-Wesstreek voorsitter, Koos Steyn, gesê.
Hy beklemtoon dat die DA die SAPD se ondersoek ondersteun om die skuldiges agter hierdie “smeer-veldtog” te vind.
Intussen het die burgemeester en sy gesin geweldige trauma ervaar. Steyn sê dit is onaanvaarbaar dat politieke opponente in Suid-Afrika vals klagtes lê of selfs bewyse plant om mededingers te probeer diskrediteer. “Dit kan nie ’n politieke taktiek word nie,” waarsku hy.
Alhoewel Van Rooy van alle aanklagte onthef is, het die intimidasie egter nie opgehou nie. Die afgelope twee weke is hy gekonfronteer met doodsdreigemente en drie pogings tot huisbraak.
Die DA veroordeel hierdie misdadigheid ten sterkste en bevestig dat die polisie nou ’n ondersoek hieroor geloods het.
Ondanks hierdie persoonlike aanvalle het dienslewering aan inwoners van Bergrivier stabiel en onafgebroke voortgeduur. “Ons loof die vasberadenheid van burgemeester Van Rooy en bedank die gemeenskap vir hul volgehoue ondersteuning,” sluit Steyn af.
Die DA het belowe om die saak noukeurig te volg, totdat die regte mense in hegtenis geneem en hof toe gebring word.
