In Kosovo-Nedersetting
Verslaggewer – Felicity Jooste
Kaapstad:- In die vroeë oggendure van Maandag, het ’n verwoestende brand die Kosovo-nedersetting in Philippi getref.
Die vuur, wat omstreeks 3-uur die oggend uitgebreek het, het binne minute versprei en minstens ses informele strukture vernietig.
Veertien inwoners het hul huise verloor, en drie mense het tragies in die vlamme omgekom. Brand- en Reddingsdienste van Kaapstad het vinnig op die toneel gereageer en die vuur teen 4:30 geblus. Ongelukkig is die liggame van drie slagoffers kort daarna gevind.
Volgens polisiewoordvoerder, AO Joseph Swartbooi, ondersoek die Samora Machel-polisie tans die oorsaak van die brand. Twee van die slagoffers was 19 en 20 jaar oud, terwyl die ouderdom van die derde persoon nog onbekend is.
Die owerhede doen ’n beroep op enigiemand met inligting om Crime Stop te skakel by 08600 10111 of die MySAPS-toepassing te gebruik om anoniem inligting te verskaf.
