Twee Oorwinnings in één dag, én die T20-kroon.
Deur Isaac Cloete
NABABEEP:- Die Nababeep Krieketklub het Saterdag die Namakwalandse krieketgemeenskap aan die gons gehad, nadat hulle twee kragmetings op een dag gewen het.
Dié vertoning het hulle uiteindelik as T20-kampioene gekroon.
In die semi-finaal het Nababeep die sterk Steinkopf Krieketklub op Okiep se veld met ag paaltjies afgeransel. Steinkopf het 103/7 aangeteken, maar Nababeep het koelweg met 106/2 geantwoord.
’n Paar uur later het hulle in die finaal teen die gewilde en gedugte Okiep Krieketklub uitgestap.
Appels steel die skou
Die ongelooflike talent van Nicholas “Appels” Cloete het dwarsdeur die dag uitgeskiet.
In die finaal het hy gehelp om Okiep tot ’n middelmatige 136/8 te beperk met ’n briljante boul-ontleding van 3/10.
Okiep se Claud Olivier het ’n keurige 33 vir sy span aangeteken.
Maar toe dit tyd word vir Nababeep om te kolf, het die vuurwerke begin.
April & Cloete het Okiep bont en blou geslaan.
Nababeep se aanvangspaar het Okiep se boulers behoorlik onder druk geplaas. Die wenlopies is binne 13 beurte behaal.
Lucian April – ’n majestueuse 62(41)*
Marlin Cloete – ’n vernietigende 60 (30)
Nababeep wen die finaal met 9 paaltjies.
Reeks-presteerders
Jade “Outlaw” Jantjies (Nababeep): Meeste paaltjies in die T20-reeks.
Nicholas “Appels” Cloete: Man of the Tournament.
Appels se naam loop nou “viervoetig in die wandelgange van krieketsale” regdeur Namakwaland, en nie verniet nie. Behalwe sy 3 paaltjies in die finaal, het hy vroeër die dag nóg 3 paaltjies en ’n vinnige 57* teen Steinkopf ingepalm.
Kaptein Monré Macdonald: “Ons was die buiteperde, nou is ons kampioene”
Macdonald vertel dat die span aanvanklik nie genoeg spelers gehad het in die eerste rondes nie, maar hulle het deurgedruk.
“Ons was beslis die buiteperde. Daarom het ons harder gewerk om te wys ons hóór nie by die voorspelling nie,” sê hy.
“Ons het vir Steinkopf mooi gewen en daardie momentum finaal toe gevat. “Ek het volle vertroue in elke speler gehad.”
Okiep, die voormalige kampioen wat elke wedstryd gewen het, was die gunsteling vir die titel. Maar dit het Nababeep net meer vasberade gemaak.
Macdonald het afgesluit:
“Ons is hier om te bly. Dankie aan al ons ondersteuners, waar hulle ook al is.
Ons gaan hierdie trofee met waardigheid verdedig.
En ons nooi die publiek, sluit aan by Nababeep Krieketklub”
“Dis ’n wenklub.”
