Verslaggewer – Isaac Cloete
Springbok:- Die afgelope naweek was ‘n swart een vir die inwoners van die Nama Khoi-area, met drie tragiese ongelukke op die N7-pad wat vyf lewens geëis het en ten minste vyf mense ernstig beseer het.
Vrydagnamiddag het een persoon op slag gesterf toe hulle voertuig van die pad af is. Die ander twee insittendes is ernstig beseer en na groter hospitale buite Springbok vervoer. Volgens beskikbare inligting was die betrokkene ‘n vader (ook die bestuurder) en sy twee dogters van Steinkopf.
Saterdagoggend het ‘n nog groter skok die Nama Khoi-gebied getref. Drie persone het omgekom net buite Steinkopf toe hulle voertuig se buiteband glo gebars het. Die ander twee insittendes was aanvanklik ernstig beseer maar stabiel, volgens hulle families, en is steeds in die hospitaal om te herstel. Die oorledenes was twee van Pella en een van Okiep.
Die hartseer was skaars verwerk toe die derde ongeluk Sondagoggend plaasgevind het by Rooiwinkel, naby Okiep. ‘n Pa (die bestuurder) en sy seun was betrokke; die pa het in die ongeluk gesterf, terwyl die seun in die hospitaal opgeneem is. Die twee is oorspronklik van Steinkopf, maar het onlangs op Rooiwinkel gewoon, volgens familie.
Binne een naweek het Namakwalandse gesinne vyf geliefdes verloor, met nog vyf ernstig beseerdes in hospitale. Die N7, bekend as die “pad van die dood”, het weer sy berugte reputasie bevestig.
Hernude oproepe vir gebede en goddelike beskerming oor die area is nou aan die orde van die dag. Verskeie persone, insluitend Paul Swartbooi, het hulle gevoelens in skrif vasgelê om die bedroefde gemeenskappe te ondersteun.
